રહેમાન ડાકેટની સુરતમાંથી ધરપકડ સુરત પોલીસને મોટી સફળતા મળી છે. કુખ્યાત ઈરાની ગેંગના લીડર રાજુ ઈરાનીને સુરત પોલીસે ઝડપી લીધો છે. આ ધરપકડ ગંભીર ગુનાહિત પ્રવૃત્તિના સંદર્ભમાં કરવામાં આવી છે. પોલીસ સૂત્રોના જણાવ્યા અનુસાર રાજુ ઈરાની લાંબા સમયથી સુરક્ષા એજન્સીઓની નજરમાં હતો. અનેક રાજ્યોની પોલીસ દ્વારા તેની શોધ ચાલી રહી હતી.
રાજુ ઈરાની સામે દેશભરમાં 20 થી વધુ ગંભીર ગુનાઓ નોંધાયેલા છે, જેમાં લૂંટ, ખંડણી, ગેરકાયદેસર હથિયારોની હેરાફેરી, ધમકીઓ અને ગુનાહિત કાવતરું સામેલ છે. સુરત પોલીસ દ્વારા તેની ધરપકડ બાદ પૂછપરછ દરમિયાન અનેક મોટા ખુલાસા થવાની શક્યતા છે.
આ પણ વાંચોઃ સુરતમાં ISPL ઓપનિંગ સેરેમનીમાં બિગ બીને જોવા માટે મોટી નાસભાગ, ભીડ બેકાબૂ થતાં કાચનો ગેટ તૂટી ગયો
સુરત પોલીસે સમગ્ર મામલે તપાસ શરૂ કરી છે
ધરપકડ બાદ સુરત પોલીસે રાજુ ઈરાનીના રિમાન્ડ મંજૂર કરી તેની પૂછપરછ શરૂ કરી છે. તપાસ એજન્સીઓ તેના મદદગારો, સહયોગીઓ અને ભંડોળના સ્ત્રોતો વિશે માહિતી મેળવવાનો પ્રયાસ કરી રહી છે. આ સાથે પોલીસ એ પણ તપાસ કરી રહી છે કે આ ગેંગ દેશના કયા કયા રાજ્યોમાં સક્રિય હતી અને કેવા પ્રકારની ગુનાહિત પ્રવૃત્તિઓમાં સંડોવાયેલી હતી.
નેટવર્ક અનેક રાજ્યોમાં ફેલાયેલું છે
સૂત્રોના જણાવ્યા અનુસાર ઈરાની ગેંગનું નેટવર્ક દેશના અનેક રાજ્યોમાં ફેલાયેલું છે. રાજુ ઈરાની પર સંગઠિત રીતે ગેંગ ચલાવવાનો અને યુવાનોને ગેંગમાં સામેલ કરવાનો આરોપ છે. પોલીસને આશા છે કે પૂછપરછથી ફરાર આરોપીઓ તેમજ ગેંગના અન્ય મોટા માથાઓ સુધી પહોંચવામાં મદદ મળશે. આ ઉપરાંત ટોળકી કોની છત્રછાયામાં ચાલતી હતી અને તેના સાગરિતો કોણ હતા સહિતના અનેક પાસાઓ પણ બહાર આવવાની શક્યતા છે.