અમદાવાદ પોલીસની દારૂ જપ્તી રથયાત્રાઃ ગુજરાતમાં દારૂબંધી માત્ર કાગળ પર હોવાથી અમદાવાદમાં દારૂની હેરાફેરી થઈ રહી છે. વિદેશી દારૂનો જથ્થો અન્ય રાજ્યોમાંથી કોઈપણ અવરોધ વિના આવી રહ્યો છે. પોલીસ દ્વારા નાકાબંધીનો દાવો, તો પછી અન્ય રાજ્યોમાંથી દારૂ કેવી રીતે પહોંચે છે અમદાવાદ? રથયાત્રા પૂર્વે પોલીસે દારૂના દૂષણને ડામવા પ્રયાસો કર્યા હતા.
મોડી રાત્રે મહેસાણાથી દારૂ ભરેલી કારનો ફિલ્મી ઢબે પીછો કરવામાં આવ્યો હતો. નવાઈની વાત તો એ છે કે લાખો રૂપિયાની લક્ઝુરિયસ કાર આ દારૂ ભરેલા વાહનોને પાયલોટીંગ કરતી હતી. પોલીસે એક કાર ઘાટલોડિયામાંથી અને બીજી કાર કાગડાપીઠ પોલીસ સ્ટેશન વિસ્તારના કાંકરિયામાંથી મળી આવી હતી. આમ, અમદાવાદના કાગડાપીઠ, મેઘાણીનગર, માધુપુરા અને એરપોર્ટ વિસ્તારમાંથી 30 લાખથી વધુની કિંમતનો વિદેશી દારૂ પકડી પાડી 16 બુટલેગરો સામે ગુનો નોંધી વધુ તપાસ હાથ ધરી છે.
પીસીબીએ ચોક્કસ બાતમી આધારે વોચ ગોઠવી હતી અને મહેસાણા તરફથી રીંગરોડ પર પાયલોટેજ સાથે આવી રહેલી દારૂ ભરેલી કારનો પીછો કર્યો હતો. જેમાં ઘાટલોડિયા વિસ્તારમાંથી એક કાર દારૂ સાથે ઝડપાઈ હતી, જ્યારે બીજી કાર કાંકરિયામાંથી પીછો કરીને કબજે કરવામાં આવી હતી. કાગડાપીઠ પોલીસે રૂ.10.57 લાખની કિંમતના વિદેશી દારૂ સાથે 13 બુટલેગરો સામે ગુનો નોંધી વધુ તપાસ હાથ ધરી છે. જ્યારે મેઘાણીનગર પોલીસે નીરજ ભાવસાર અને નરેન્દ્રસિંહ ચૌહાણ સામે ગુનો નોંધી તેમની પાસેથી રૂ.6.36 લાખનો વિદેશી દારૂ કબજે કર્યો હતો.
તેમજ માધુપુરા પોલીસે ગુજરાત જીનીંગ મીલ કમ્પાઉન્ડમાંથી વિનીત હરવાણી સામે ગુનો નોંધી તેની પાસેથી રૂ.6 લાખનો દારૂ કબજે કર્યો હતો. આ ઉપરાંત એરપોર્ટ વિસ્તારમાંથી પણ રૂ.7.29 લાખનો દારૂ જપ્ત કરીને કાયદેસરની કાર્યવાહી હાથ ધરવામાં આવી છે.