સુરત સમાચાર: સુરતના ઉમરા વિસ્તારમાં એક ચોંકાવનારી ઘટના સામે આવી છે. અહીં, 26 વર્ષની છૂટાછેડા લીધેલી માતાએ તેના વહાલા 4 વર્ષના પુત્રની હત્યા કરીને આત્મહત્યા કરી લીધી. આ દુ:ખદ ઘટના પાછળ પૂર્વ પતિ દ્વારા માનસિક ત્રાસ જવાબદાર હોવાના ગંભીર આક્ષેપો થયા છે.
શું છે સમગ્ર મામલો?
મળતી માહિતી મુજબ ઉમરા વિસ્તારમાં રહેતી 26 વર્ષીય પૂનમ શાહના પહેલેથી જ છૂટાછેડા થઈ ગયા હતા. તેને 4 વર્ષનો પુત્ર શિવાય હતો, જે તેની સાથે રહેતો હતો. મહિલાએ પહેલા તેના માસૂમ પુત્ર શિવાયને ફાંસી આપી અને પછી તેણે પોતે પણ તે જ પંખા પર લટકીને જીવનનો અંત આણ્યો.
પરિવારના ગંભીર આક્ષેપો
આપઘાતની જાણ થતાં જ પરિવારમાં શોકનો માહોલ છવાઈ ગયો હતો. પૂનમના પરિવારે તેના પૂર્વ પતિ કરણ શાહ પર ગંભીર આરોપ લગાવ્યા છે. તેના કહેવા પ્રમાણે, છૂટાછેડા પછી પણ કરણ પૂનમને સતત હેરાન કરતો હતો અને માનસિક ત્રાસ આપતો હતો. આ સતત ત્રાસથી કંટાળીને આખરે પૂનમે આ કરુણ પગલું ભર્યું હોવાનું મનાય છે.
પોલીસે ઘટના સ્થળે પહોંચી તપાસ હાથ ધરી હતી
ઘટનાની જાણ થતાં જ ઉમરા પોલીસનો કાફલો ઘટના સ્થળે પહોંચી ગયો હતો. પોલીસે બંને મૃતદેહોને પોસ્ટમોર્ટમ માટે નવી સિવિલ હોસ્પિટલમાં ખસેડી એફએસએલની મદદથી પુરાવા એકત્ર કર્યા છે. પોલીસ હવે પરિવારના નિવેદનો અને પૂનમના મોબાઈલ રેકોર્ડના આધારે પૂર્વ પતિના ત્રાસને કારણે આ બંનેના જીવનનો અંત આવ્યો કે કેમ તેની તપાસ કરી રહી છે.
આત્મહત્યા એ કોઈપણ સમસ્યાનો ઉકેલ નથી. જો તમે અથવા તમે જાણતા હોવ તો કોઈ નકારાત્મક વિચારોથી તણાવગ્રસ્ત અથવા ભરાઈ ગયા હોય, તો ગભરાશો નહીં. તમે મદદ મેળવવા માટે નિઃસંકોચ અનુભવી શકો છો. ગુજરાત સરકારની હેલ્પલાઇન ‘જીવન આસ્થા’ (1800 233 3330) પર નિષ્ણાંતો દ્વારા 24 કલાક મફત અને ખાનગી કાઉન્સેલિંગ આપવામાં આવે છે. યાદ રાખો, તમારું જીવન અમૂલ્ય છે.