સુરત કોર્પોરેશન : દેશના સ્વચ્છતા સર્વેક્ષણમાં સતત પ્રથમ ક્રમે આવતા સુરત શહેરમાં કેટલીક જગ્યાએ સ્વચ્છતા વ્યવસ્થાની વાસ્તવિકતા ચિંતાજનક બની રહી છે. શહેરના મધ્ય ઝોન હેઠળ આવતા સલાબતપુરા વિસ્તારમાં આવેલી પાલિકાની ડીકેએમ હોસ્પિટલ પાસે છેલ્લા 15 દિવસથી રોડ પર કચરો પડ્યો હોવાથી સ્થાનિક રહીશો અને વાહનચાલકોને ભારે હાલાકીનો સામનો કરવો પડી રહ્યો છે.
સ્થાનિકોના જણાવ્યા મુજબ આ અંગે મહાનગરપાલિકામાં અનેક વખત રજૂઆતો કરવા છતાં સમસ્યાનો કોઈ કાયમી ઉકેલ આવ્યો નથી. ડોર ટુ ડોર ગાર્બેજ કલેક્શન સેવા પણ નિયમિત ઉપલબ્ધ ન હોવાની ફરિયાદો છે. પરિણામે જાહેર માર્ગો પર કચરાના ઢગલા જોવા મળી રહ્યા છે અને આસપાસના વિસ્તારમાં અસહ્ય દુર્ગંધ ફેલાઈ રહી છે.
ચોમાસાની ઋતુ નજીક આવતાં જ મચ્છરજન્ય અને ચેપી રોગો ફાટી નીકળવાની દહેશત પણ સ્થાનિકોએ વ્યક્ત કરી છે. જો કે, અમુક વિસ્તારના લોકો દ્વારા માત્ર નગરપાલિકા તંત્રને જ જવાબદાર ઠેરવવામાં આવતા જાહેર સ્થળોએ કચરો ફેંકવાની વૃત્તિના કારણે પરિસ્થિતિ વધુ ગંભીર બની રહી હોવાનું ચર્ચાઈ રહ્યું છે.
સ્વચ્છ સુરતનું ગૌરવ જાળવી રાખવા માટે નગરપાલિકાએ કચરો ઉપાડવાની વ્યવસ્થા વધુ અસરકારક બનાવવી જરૂરી બની છે અને નાગરિકોએ પણ પોતાની જવાબદારી નિભાવવી જોઈએ. અન્યથા સ્વચ્છતાના દાવાઓ વચ્ચે શહેરના કેટલાક વિસ્તારોમાં ફેલાયેલી ગંદકી નગરપાલિકા અને લોકો બંને માટે ચિંતાનો વિષય છે.