ડુમસ સી ફેસ પ્રોજેક્ટ: સુરત મહાનગરપાલિકા દ્વારા 166 કરોડના ખર્ચે ડુમસ સી ફેસ ડેવલપમેન્ટનો પ્રથમ તબક્કો સુરતના લોકો માટે ખુલ્લો મુકવામાં આવ્યો છે. આ ડુમસ સી ફેસ પ્રોજેક્ટ સુરતીઓ માટે આકર્ષણનું કેન્દ્ર બન્યો છે અને પહેલા જ વીકએન્ડમાં જ તેની ભીડ જામી હતી. જોકે, પાલિકાએ ડુમસ સી ફેસ માટે સાત વાગ્યાની સમય મર્યાદા નક્કી કરતાં સુરતીઓમાં ભારે રોષ જોવા મળી રહ્યો છે. મોડી સાંજથી રાત સુધી ફરવા ટેવાયેલા સુરતીઓને પાલિકાની સમય મર્યાદા યોગ્ય જણાતી નથી. સી ફેસની મુલાકાતે આવેલા સુરતીઓ રોષે ભરાયા છે કે 166 કરોડનો ખર્ચ કર્યા બાદ તેને સાંજે 7 વાગ્યે બંધ કરવું યોગ્ય નથી અને અન્ય પ્રોજેક્ટની જેમ સમય મર્યાદા લંબાવવાની માંગ કરી રહ્યા છે.
ખાણી-પીણીના શોખીન સુરતીઓ કામ પરથી આવ્યા બાદ મોડી રાત સુધી બહાર ફરવા ટેવાયેલા હોય છે અને પાલિકા દ્વારા બનાવવામાં આવેલ ડુમસ સી ફેસ તેમના માટે હોટ ફેવરિટ બની ગયો છે. પરંતુ પ્રોજેક્ટ લોકાર્પણના ગણતરીના દિવસોમાં જ આ પ્રોજેક્ટની સમય મર્યાદા સુરતીઓને નર્વસ બનાવી રહી છે. 166 કરોડના ખર્ચ બાદ નગરપાલિકાએ પ્રોજેક્ટની સમય મર્યાદા સાંજે 7 વાગ્યે નિયત કરી છે અને મુલાકાતીઓને સાંજે 7 વાગ્યે બહાર કાઢવામાં આવી રહ્યા છે, જેના કારણે સુરતીઓમાં રોષ ફેલાયો છે. સી ફેસની મુલાકાત લેતા લોકો નગરપાલિકા તંત્ર સામે સવાલ ઉઠાવી રહ્યા છે. મુલાકાતીઓનું કહેવું છે કે 166 કરોડના ખર્ચે બનેલો પ્રોજેકટ સાંજે 7 વાગે બંધ કરવાનો હોય તો લોકો તેની મજા કેવી રીતે માણી શકે? શહેરમાં દિવસ દરમિયાન ગરમી રહે છે અને મોટાભાગના લોકો કામ કર્યા પછી સાંજે બહાર જાય છે. પરંતુ સાંજના સમયે સી ફેસ લોક કરી દેવામાં આવતા લોકોમાં કચવાટ ફેલાયો છે.
કેટલાક મુલાકાતીઓએ આક્રોશ વ્યકત કર્યો હતો કે, “નગરપાલિકા પ્રોજેક્ટ બનાવવા માટે કરોડો રૂપિયા ખર્ચે છે, પરંતુ લોકો તેનો આનંદ માણી શકે તે માટે યોગ્ય વ્યવસ્થા કરવામાં આવતી નથી. શહેરના અન્ય સ્થળોએ લોકો મોડી રાત સુધી રખડતા હોય છે, અહીં શા માટે લોકોને સાંજ પડતાં જ હાંકી કાઢવામાં આવે છે?”
ડુમસ બીચની ઠંડી હવા અને સાંજનું વાતાવરણ આ વિસ્તારનું સૌથી મોટું આકર્ષણ છે. ગરમી અને તડકાને કારણે અહીં દિવસ દરમિયાન ઓછા લોકો આવે છે, જ્યારે સાંજના સમયે મોટી સંખ્યામાં લોકો પરિવાર સાથે સમય પસાર કરવા અહીં આવે છે. આવી સ્થિતિમાં લોકોને સાંજે 7 વાગ્યે પ્રવેશ બંધ કરવાનું અયોગ્ય લાગી રહ્યું છે.
સુરતીઓની સ્પષ્ટતા છે કે, પાલિકા શહેર માટે 166 કરોડનો પ્રોજેક્ટ બનાવે તો મોડી સાંજ સુધી લોકો તેનો આનંદ માણી શકે તેવી વ્યવસ્થા કરવી જોઈએ અને રાત્રે 11 વાગ્યા સુધી આ પ્રોજેક્ટ મુલાકાતીઓ માટે ખુલ્લો રાખવો જોઈએ. જો પાલિકા સમય મર્યાદામાં ફેરફાર નહીં કરે તો આગામી દિવસોમાં પાલિકાને સુરતીઓના રોષનો સામનો કરવો પડે તો નવાઈ નહીં.
પાલિકાએ ડુમસ સી ફેસ પરથી એક જ દિવસમાં 300 કિલો કચરો એકઠો કર્યો હતો
સુરત મહાનગરપાલિકાનો ડુમસ સી ફેસ પ્રોજેક્ટ વીકએન્ડમાં ભરચક હતો અને સમય મર્યાદાના કારણે વિવાદમાં છે તો બીજી તરફ પાલિકાએ અહીં આવતા લોકોમાં કચરો અલગ કરવા માટે જાગૃતિ લાવવાનો પ્રયાસ કર્યો છે. નગરપાલિકાએ સંરક્ષણ પ્રેમી સંસ્થાઓ સાથે મળીને ડુમસ સી ફેસ અને દરિયા ગણેશ મંદિર પાસેના બીચ પર વિવિધ સ્ટોલ અને જૂથોનું આયોજન કર્યું હતું અને જાગૃતિ આપવા માટે લાઉડ સ્પીકર લગાવ્યા હતા. અને ડુમસ સી ફેસ અને ડુમસ બીચ વિસ્તારમાંથી સુરત મહાનગર પાલિકાના સફાઈ કામદારો દ્વારા 300 કિલો જેટલો કચરો ઉપાડવામાં આવ્યો હતો.