સુરતમાં નવજાતનો મૃતદેહ મળ્યો: સુરત જિલ્લાના કીમ ઈસ્ટ વિસ્તારમાંથી ખૂબ જ હૃદયદ્રાવક અને શરમજનક ઘટના પ્રકાશમાં આવી છે. અહીંના કુદસાદ ગામની સીમમાં એક નવજાત બાળક મૃત હાલતમાં મળી આવ્યું હતું, જેના કારણે સમગ્ર પરગણામાં ખળભળાટ મચી ગયો હતો.
ઘટનાની વિગતવાર માહિતી અનુસાર, કીમ પૂર્વના કુદસાદ ગામના મુન્ના એજન્સી વિસ્તારમાં સંગમ ઢાલ પાસેથી આ શિશુનો મૃતદેહ મળી આવ્યો હતો. આ વિસ્તારમાં સતત લોકોની અવરજવર રહેતી હોવા છતાં પોતાનું પાપ છુપાવવા માટે કોઈ અજાણી વ્યક્તિ દ્વારા નવજાત શિશુને અહીં ત્યજી દેવામાં આવ્યું હતું. જ્યારે શિશુ મળી આવ્યું ત્યારે તેનું મોં છુપાવેલું હતું.
રાત્રિના અંધકારમાં નિકાલ થવાની આશંકા
પોલીસની પ્રાથમિક તપાસમાં કોઈ અજાણી માતાએ સામાજીક ડર કે અન્ય કોઈ કારણસર રાત્રિના અંધકારનો લાભ લઈ બાળકનો નિકાલ કર્યો હોવાનું જણાય છે. નવજાત શિશુને જોવા લોકોના ટોળા ઉમટી પડ્યા હતા.
પોલીસ તપાસમાં ઘટનાની જાણ થતાં જ જાગૃત નાગરિકોએ કીમ પોલીસને જાણ કરી હતી. કીમ પોલીસે તાત્કાલિક ઘટના સ્થળે પહોંચી બાળકના મૃતદેહને પોસ્ટમોર્ટમ માટે હોસ્પિટલ ખસેડ્યો હતો. હાલ પોલીસે આ મામલે અજાણ્યા શખ્સ સામે ગુનો નોંધી વધુ તપાસ હાથ ધરી છે. પોલીસ દ્વારા આસપાસના વિસ્તારના સીસીટીવી ફૂટેજની ચકાસણી કરવામાં આવી રહી છે. જેથી માતા કે બાળકને ત્યજી દેનાર વ્યક્તિ સુધી પહોંચી શકાય.