સુરતમાં આગ રાજ્યમાં આગની ઘટનાઓ સતત વધી રહી છે. ત્યારે સુરતના વરાછામાં એક વેરહાઉસમાં સિલિન્ડર બ્લાસ્ટ થયો હતો. વરાછા વિસ્તારમાં વૈભવ લક્ષ્મી રેસિડેન્સી પાછળ ગેસ સિલિન્ડરમાં અચાનક વિસ્ફોટ થતાં સ્થાનિકોમાં અફરા-તફરીનો માહોલ સર્જાયો હતો. મળતી માહિતી મુજબ, વૈભવ લક્ષ્મી રેસિડેન્સીની પાછળ એક કાગળના શેડમાં ચાલી રહેલા ફર્નિચરના ગોડાઉનમાં જોરદાર વિસ્ફોટ થયો હતો, ત્યારબાદ આગ ફાટી નીકળી હતી. આગની જાણ થતાં ફાયર સ્ટેશનની ત્રણ ગાડીઓ ઘટના સ્થળે પહોંચી હતી.
ગોડાઉનમાં કેમિકલના કારણે આગ ફાટી નીકળી હતી
પ્રાપ્ત માહિતી અનુસાર, સુરતના વરાછા વિસ્તારમાં વૈભવ રેસિડેન્સી પાસેના એક ગોડાઉનમાં ગેસ સિલિન્ડરમાં બ્લાસ્ટ થયો હતો. ગોડાઉનમાં કેમિકલ હોવાના કારણે આગએ વિકરાળ સ્વરૂપ ધારણ કર્યું હતું. આગ એટલી વિકરાળ બની હતી કે બે કિલોમીટર સુધી ધુમાડાના ગોટેગોટા જોવા મળ્યા હતા. અચાનક બ્લાસ્ટ થતા સ્થાનિક રહીશો દોડી આવ્યા હતા. જોરદાર બ્લાસ્ટને કારણે આસપાસના વિસ્તારની ઓફિસો અને મકાનોની બારીઓ તૂટી ગઈ હતી.
લોખંડની તિજોરી બનાવવાનું કામ કરવામાં આવ્યું હતું
ફાયર બ્રિગેડના કર્મચારીના જણાવ્યા અનુસાર ગોડાઉનમાં લોખંડની તિજોરી બનાવવાનું કામ ચાલી રહ્યું હતું. આ ગોડાઉનમાં કેમિકલનો મોટો જથ્થો હોવાથી આગ ઝડપથી ફેલાઈ હતી અને આખું ગોડાઉન રાખ થઈ ગયું હતું. હાલમાં એક અંદાજ મુજબ ગોડાઉનમાં કામ કરતા મજૂરો ગેસનો ઉપયોગ કરી રહ્યા હોવાથી ગેસ સિલિન્ડરમાં બ્લાસ્ટ થયો હોવાનું અનુમાન લગાવવામાં આવી રહ્યું છે. જો કે સમગ્ર માહિતી તપાસ બાદ બહાર આવશે.