ફ્યુઅલ અફવાઓથી વડોદરામાં ધસારો છેલ્લા 24 કલાકથી વડોદરા શહેરમાં પેટ્રોલ-ડીઝલની અછત સર્જાશે તેવી અફવાઓએ જોર પકડ્યું છે. આ અફવાઓને કારણે વડોદરાના લગભગ તમામ પેટ્રોલ પંપ પર વાહનચાલકોની લાંબી કતારો જોવા મળી રહી છે. પરિસ્થિતિ વધુ બગડે નહીં અને કાયદો અને વ્યવસ્થા જળવાઈ રહે તે માટે વડોદરા પોલીસ હવે એક્શન મોડમાં છે.
પેટ્રોલ પંપ પર પોલીસ તૈનાત
મળતી માહિતી મુજબ, મંગળવારે (24 માર્ચ) સવારથી જ વડોદરા શહેરના મુખ્ય પેટ્રોલ પંપ પર વાહનોની લાંબી કતારો લાગી હતી. ભીડને કાબૂમાં લેવા માટે વિવિધ વિસ્તારોમાં પોલીસ કાફલો તૈનાત કરવામાં આવ્યો છે. પોલીસ જાહેર જાહેરાત પ્રણાલી અને લાઉડસ્પીકરનો ઉપયોગ કરીને લોકોને વિનંતી કરી રહી છે કે, ‘શહેરમાં પૂરતું બળતણ ઉપલબ્ધ છે, કૃપા કરીને અફવાઓથી ગભરાશો નહીં, અને જરૂરિયાત મુજબ જ પેટ્રોલ લાવો.’
આ પણ વાંચોઃ ગુજરાતના અનેક શહેરોમાં પેટ્રોલ પંપ પર લાંબી કતારોને લઈને વિધાનસભામાં હંગામો, વિપક્ષે સરકાર પર કર્યો પ્રહાર
જાહેર અને ટ્રાફિક જામની સ્થિતિમાં ફફડાટ
પેટ્રોલ પંપ પર અચાનક જ ઘસારો થતાં શહેરના મુખ્ય માર્ગો પર ટ્રાફિક જામની સમસ્યા પણ સર્જાઈ રહી છે. જો હવે પેટ્રોલ નહીં ભરાય તો આગામી દિવસોમાં વાહનવ્યવહાર થંભી જશે તેવી દહેશત લોકોમાં છે. જો કે, વહીવટીતંત્ર અને તેલ કંપનીઓએ સ્પષ્ટતા કરી છે કે સપ્લાય ચેઇન ચાલુ છે અને ગભરાવાની જરૂર નથી.