જિલ્લાના રાજમાર્ગો પર વધી રહેલા અકસ્માતો વચ્ચે
નરોડાના બે યુવકો હિંમતનગર જઈ રહ્યા હતા ત્યારે અકસ્માત સર્જાયોઃ એક યુવકને ગંભીર ઈજા
ગાંધીનગરઃ ગાંધીનગર નજીક ચિલોડા હિંમતનગર હાઇવે પર છાછા પાસે બાઇક પર આવેલા નરોડાના બે યુવાનોને ટક્કર મારતાં ચાલક નાસી ગયો હતો. ગંભીર અકસ્માતમાં એક યુવકનું મોત નીપજ્યું હતું જ્યારે અન્ય એકને ઈજા થઈ હતી. બનાવ સંદર્ભે ચિલોડા પોલીસે ફરાર કાર ચાલક સામે ગુનો નોંધી તેને પકડવા માટે ઝુંબેશ હાથ ધરી છે.
પાટનગર ગાંધીનગર અને તેની આસપાસના રાજમાર્ગો પર છેલ્લા ઘણા સમયથી અકસ્માતના બનાવો વધી રહ્યા છે અને હીટ એન્ડ રનના બનાવોમાં પણ ચિંતાજનક વધારો જોવા મળી રહ્યો છે. આ સ્થિતિ વચ્ચે ગઈકાલે ચિલોડા હિંમતનગર હાઈવે પર છાછા પાસે વધુ એક હીટ એન્ડ રનની ઘટનામાં નરોડાના એક યુવકનું મોત નીપજ્યું હતું. બનાવ અંગે પોલીસ સૂત્રો પાસેથી પ્રાપ્ત વિગતો મુજબ અમદાવાદના નરોડા વિસ્તારમાં રહેતા રમેશભાઈ કાનજીભાઈ પ્રજાપતિનો 35 વર્ષીય પુત્ર કિશનકુમાર રવિવારે સવારે તેના મિત્ર સાવન સાથે મોટરસાઈકલ પર હિંમતનગર જઈ રહ્યો હતો. સવારે 11.00 વાગ્યાના સુમારે તેઓ છચા બ્રિજ પરથી નીચે ઉતરી રહ્યા હતા, ત્યારે લાલ કલરના ફોર વ્હીલરના ચાલકે બેદરકારીપૂર્વક કાર હંકારી કિશનકુમારની બાઇકને પાછળથી ટક્કર મારી હતી. અકસ્માત બાદ કાર ચાલક ઘટનાસ્થળેથી ફરાર થઈ ગયો હતો. અકસ્માતને પગલે આસપાસના લોકો અને વાહન ચાલકો એકત્ર થઈ ગયા હતા અને તાત્કાલિક બંને ઈજાગ્રસ્તોને 108 એમ્બ્યુલન્સ દ્વારા ગાંધીનગર સિવિલ હોસ્પિટલમાં ખસેડાયા હતા., જ્યાં ફરજ પરના તબીબે કિશનકુમારને મૃત જાહેર કર્યો હતો. જ્યારે તેના મિત્ર સાવનની હાલત નાજુક હોવાથી તેને વધુ સારવાર માટે અમદાવાદ સિવિલ હોસ્પિટલમાં રીફર કરવામાં આવ્યો છે. આ અંગે મૃતક કિશનકુમારના પિતા રમેશભાઈએ ચિલોડા પોલીસ મથકે અજાણ્યા કાર ચાલક સામે ફરિયાદ નોંધાવી છે.