વડોદરા, તા.12 ગલ્ફ વોરની સ્થિતિને કારણે ગેસની આયાત પર અસર પડી હોવાથી કેન્દ્ર સરકારે દેશમાં કોમર્શિયલ ગેસના વપરાશ પર નિયંત્રણો મૂક્યા છે, પરંતુ ઘરગથ્થુ એલપીજી ગેસના બાટલાના વિતરણ અને ઉત્પાદન પર કોઈ પ્રતિબંધ નથી અને તેને પ્રાથમિકતા આપવામાં આવી છે. જોકે હાલમાં એલપીજી ગેસના બાટલાની કોઈ અછત નથી, પરંતુ ગભરાટના કારણે લોકો બુકિંગ માટે ગેસ એજન્સીઓની બહાર લાઈનો લગાવી રહ્યા છે.
પ્રાપ્ત માહિતી અનુસાર, એલપીજી ગેસના બાટલા બુક કરાવવાની ઓનલાઈન પ્રક્રિયામાં પડતી મુશ્કેલીની બુમરાણ વચ્ચે લોકો હવે ગેસ એજન્સીમાં ગેસના બાટલા બુક કરાવવા માટે ધસારો કરી રહ્યા છે. ગઈકાલે શરૂ થયેલી ગેસ એજન્સીઓની બહાર લાગેલી લાઈનો આજે પણ ચાલુ રહી હતી. આજે શહેરના ચાર દરવાજા વિસ્તાર તેમજ પાણીગેટ, આજવારોડ વિસ્તારમાં ગેસ એજન્સીઓ બહાર ગ્રાહકોની લાંબી કતારો જોવા મળી હતી.
સવારથી જ લોકો કામકાજ છોડીને ગેસ એજન્સીઓની બહાર બુકિંગ કરાવવા કતારોમાં ઉભા રહે છે. સ્ટોકની વિગતો અને વપરાશની વિગતો મેળવ્યા બાદ તંત્રએ ગઈકાલે એલપીજી બોટલોની અછત નહીં હોવાની જાહેરાત કરી હોવા છતાં આજે સવારથી જ લોકો કતારોમાં ઉભા રહીને બુકિંગ કરાવતા જોવા મળ્યા હતા. યોગ્ય સમયે ગેસના બાટલા બુક કરાવવાની અપીલ કરવા છતાં ગભરાટના માર્યા લોકો બુકિંગ કરાવવા દોડી રહ્યા છે.
સૂત્રોએ જણાવ્યું હતું કે ઓઇલ કંપનીઓએ હવે એલપીજી ગેસ બોટલના સપ્લાય માટે ક્વોટા સિસ્ટમ શરૂ કરી છે. જે ગેસ એજન્સીઓ પાસે વધુ ગ્રાહકો છે તેમને દરરોજ એક વાહન અને નાની એજન્સીઓને દર બે દિવસે એક વાહન એલપીજી બોટલની ડિલિવરી કરવામાં આવી રહી છે.
52 ગેસ એજન્સીઓમાં તપાસ: ખાનગી એજન્સીઓ પાસેથી સ્ટોક મંગાવવામાં આવ્યો હતો
વડોદરા શહેર અને જિલ્લામાં સરકારી ઓઇલ કંપનીઓની 52 ગેસ એજન્સીઓ આવેલી છે. આ તમામ ગેસ એજન્સીઓનું મામલતદાર અને નાયબ મામલતદારની ટીમ દ્વારા તપાસ કરવામાં આવી રહી છે. એજન્સીઓમાં ગ્રાહકોના પ્રશ્નોની વિગતો પણ એકત્રિત કરવામાં આવે છે. માત્ર સરકારી એજન્સીઓ જ નહીં પરંતુ કેટલીક ખાનગી એજન્સીઓ પણ બોટલ સપ્લાય કરતી હોવાથી તે એજન્સીઓ પાસેથી સ્ટોકની વિગતો પણ માંગવામાં આવી છે.
બુકિંગ માટે લાઈનમાં ઉભેલી એક મહિલા નીચે પડી હતી
ગઈકાલે શહેરના પાણીગેટ વિસ્તારમાં આવેલી ગાયત્રી ગેસ એજન્સીમાં બુકિંગ માટે એક મહિલા કતારમાં પડી હતી, પરંતુ લોકોએ તેને ઉપાડીને ફરીથી કતારમાં ઊભી કરી દીધી હતી. આ ઘટના બાદ માજી મામલતદાર પણ તાત્કાલિક ઘટના સ્થળે દોડી આવ્યા હતા અને ઘટનાની જાણ કરી હતી.
બુકિંગ ન હોવાની ફરિયાદો વચ્ચે દરરોજ ડબલ બુકિંગ
એલપીજી બોટલ બુકિંગ માટે ઓનલાઈન નંબરની સુવિધા ઉપલબ્ધ છે. ફરિયાદો મળી રહી છે કે જ્યારે ગ્રાહકો બુકિંગ માટે આ નંબરો પર સંપર્ક કરે છે ત્યારે નંબરો વાગતા નથી. બીજી તરફ તંત્ર દ્વારા એવો બચાવ કરવામાં આવ્યો છે કે બુકિંગ માટેના ધસારાને કારણે સર્વર ધીમું પડી જાય છે અને તેના કારણે બુકિંગમાં સમસ્યા સર્જાઈ છે. પાણીગેટ ખાતે ગાયત્રી ગેસ એજન્સીએ જણાવ્યું હતું કે અમારી એજન્સીમાં દરરોજ 800 થી 900 બુકિંગ થાય છે પરંતુ છેલ્લા બે દિવસથી અમે દરરોજ 2100 બુકિંગ કરી રહ્યા છીએ.