અમદાવાદઃ રાજ્યના લોકોને આકરી ગરમીમાંથી રાહત મળશે. હવામાન વિભાગના જણાવ્યા અનુસાર આગામી સાત દિવસ સુધી રાજ્યમાં હળવો વરસાદ પડશે. દાહોદ, છોટા ઉદેપુર, નર્મદા, ડાંગ, તાપી, નવસારી, વલસાડ અને દમણ-દાદરા નગર હવેલીમાં છૂટાછવાયા સ્થળોએ હળવો વરસાદ અને ગાજવીજ સાથે વરસાદની શક્યતા છે. જ્યારે પ્રદેશના બાકીના જિલ્લાઓ અને દીવમાં શુષ્ક હવામાન રહેવાની શક્યતા છે.
હવામાન વિભાગે આગામી 7 દિવસ દરમિયાન રાજ્યમાં વરસાદની આગાહી કરી છે. રાજ્યના અનેક વિસ્તારોમાં સામાન્યથી મધ્યમ વરસાદ પડશે. કેટલાક વિસ્તારોમાં પવન સાથે વરસાદની સંભાવના છે. આ વરસાદ રાજ્યમાં પ્રિ-મોન્સૂન એક્ટિવિટીનો ભાગ હશે. જે મુજબ 5 જૂને વલસાડ, નવસારી, ડાંગ, તાપી, દમણ દાદરા-નગર હવેલી, દાહોદ અને 6 જૂને દાહોદ, છોટા ઉદેપુર, તાપી, ડાંગ, વલસાડ અને નવસારીમાં વરસાદની શક્યતા છે. દાહોદ, છોટા ઉદેપુર, વલસાડ, તાપી, નર્મદા 7 જૂને અને ગીર સોમનાથ, અમરેલી, ભાવનગર, આણંદ, પંચમહાલ, દાહોદ, વડોદરા, છોટા ઉદેપુર, નર્મદા, તાપી, ડાંગ, નવસારી અને 8મી જૂને વલસાડમાં વરસાદની શક્યતા છે.
આ ઉપરાંત 9 થી 11 જૂન દરમિયાન સામાન્યથી મધ્યમ વરસાદની આગાહી કરવામાં આવી છે.રાજકોટ, જૂનાગઢ, અમરેલી, ગીર સોમનાથ, ભાવનગર, બોટાદ, સાબરકાંઠા, મહેસાણા, ગાંધીનગર, અરવલ્લી, અમદાવાદ, ખેડા, મહિસાગર, આણંદ, પંચમહાલ, દાહોદ, વડોદરા, છોટાઉદેપુર, ભરૂચ, નર્મદા, સુરત, તાપી, ડાંગ, વલસાડ અને નવસારી. વરસાદની સંભાવના છે.
