જામનગર સમાચાર: ગુજરાત ATS અને જામનગર SOG દ્વારા સંયુક્ત ઓપરેશનમાં પંજાબ રાજ્યમાંથી હત્યાના કેસમાં વોન્ટેડ આરોપીની ધરપકડ કરવામાં આવી છે. આરોપી હેલ્પર તરીકે છૂટક મજૂરી કરીને જામનગરના મેઘપર વિસ્તારમાં છુપાયો હતો.
અમૃતસરમાં હત્યા કરીને આરોપી ફરાર થઈ ગયો હતો
ગયા મહિને પંજાબના અમૃતસરના એ ડિવિઝન પોલીસ સ્ટેશનમાં માખનસિંહ માધોલુરામની હત્યાનો ગુનો નોંધવામાં આવ્યો હતો. પંજાબ પોલીસે ગુનામાં સંડોવાયેલા અન્ય આરોપી ધરમવીરસિંહ, કરમવીરસિંધ, બિક્રમજીતસિંહ અને જ્હોનની ધરપકડ કર્યા પછી, તેઓએ અન્ય વોન્ટેડ આરોપી તરીકે લવપ્રિતસિંહ હરજીતસિંહનું નામ આપ્યું હતું. પંજાબ પોલીસે વોન્ટેડ આરોપી લવપ્રિતસિંહની માહિતી ગુજરાત ATS સાથે શેર કરી હતી.
વોન્ટેડ જામનગરના મેઘપરમાં નોકરી કરતો હતો
ગુજરાત ATS દ્વારા તપાસ હાથ ધરવામાં આવી હતી. દરમિયાન વોન્ટેડ આરોપી લવપ્રિતસિંગ હત્યા બાદ જામનગરના મેઘપર વિસ્તારની કંપનીઓમાં હેલ્પર તરીકે છૂટક મજૂરી કરવાના ઈરાદે એક દિવસ પહેલા આવ્યો હોવાની બાતમી મળી હતી.
એસઓજીની મદદથી આરોપીની ધરપકડ
ગુજરાત એટીએસ દ્વારા આ અંગેની માહિતી તાત્કાલિક જામનગર એસઓજીને આપવામાં આવી હતી. જામનગર એસઓજીએ ગુજરાત એટીએસ સાથે સંયુક્ત ઓપરેશન હાથ ધરી મેઘપરની ચાલીમાં રહેતા લવપ્રિતસિંગની ઓળખ કરી અને તેની ધરપકડ કરી. તેને વધુ પૂછપરછ માટે ગુજરાત એટીએસને રીફર કરવામાં આવ્યો હતો. અમદાવાદ ખાતે લાવવામાં આવ્યો હતો.
આ પણ વાંચોઃ ગુજરાતથી દુબઈમાં 1000 થી વધુ સિમ કાર્ડ મોકલતા સાયબર સ્કેમ નેટવર્ક પકડાયું, ‘ડિજિટલ ધરપકડ’ છેતરપિંડી તપાસમાં બહાર આવ્યું
પ્રાથમિક તપાસમાં આરોપી લવપ્રીત સિંહ હરજીતસિંગે ધરમવીર સિંહ અને અન્ય સાથીદારો સાથે અમૃતસર બસ સ્ટેન્ડ પર માખનસિંહ માધોલુરામની હત્યાના કાવતરામાં સામેલ હોવાની કબૂલાત કરી છે. ગુજરાત ATSએ હવે આ વોન્ટેડ આરોપીને આગળની કાયદેસરની કાર્યવાહી માટે અમૃતસર શહેર પોલીસને સોંપવાની પ્રક્રિયા હાથ ધરી છે.
