અમરેલી સમાચાર: અમરેલી જીલ્લાના ખાંભા ગીરના સમઢીયાળા ગામમાં કુતરાએ 2 વર્ષના બાળક પર હુમલો કર્યો અને તેને મોઢામાં ઉપાડીને ભાગવાનો પ્રયાસ કર્યો. માતા-પિતાની તકેદારીના કારણે સદનસીબે બાળકનો જીવ બચી ગયો હતો, પરંતુ કૂતરાના હુમલામાં માસૂમ ગંભીર રીતે ઘાયલ થયો હતો.
કૂતરો બાળકને છીનવીને ભાગી ગયો, માતા-પિતા પાછળ દોડ્યા
બનાવની વિગત મુજબ સમઢીયાળા ગામે રહેતા એક પરિવારનો 2 વર્ષનો બાળક તેમના ઘર પાસે રમી રહ્યો હતો. આ દરમિયાન અચાનક એક કૂતરો ત્યાં ધસી આવ્યો હતો અને માસૂમ બાળક પર હુમલો કરી ભાગવા લાગ્યો હતો. આ દ્રશ્ય જોઈને માતા-પિતાના જીવ તાળવે ચોંટી ગયા હતા અને તેઓ કૂતરા પાછળ દોડ્યા હતા. સતત પીછો કરવાને કારણે કૂતરો બાળકને અધવચ્ચે છોડીને ભાગી ગયો હતો.
7 ટાંકા આવ્યા, અમરેલી સિવિલમાં ખસેડાયા
કૂતરાએ બાળકના માથામાં ગંભીર ઘા મારતા તેને લોહીલુહાણ હાલતમાં હોસ્પિટલમાં ખસેડાયો હતો. ઇજાગ્રસ્ત બાળકને માથામાં 7 ટાંકા આવ્યા હતા. બાળકને અમરેલીની સિવિલ હોસ્પિટલમાં સારવાર આપવામાં આવી હતી.
આ પણ વાંચોઃ કચ્છમાં ચિત્તા પુનઃવસન માટે NTCA લીલી ઝંડી, બન્ની ગ્રાસલેન્ડ અભયારણ્ય બનશે, કેન્યાથી 4 ચિત્તા લાવવામાં આવશે!
ગામમાં ભયનો માહોલ છે
આ ઘટનાને પગલે નાના એવા સમઢીયાળા ગામમાં ભયનો માહોલ ફેલાયો છે. રખડતા કૂતરાઓના ત્રાસને કારણે બાળકો માટે ઘરની બહાર નીકળવું જોખમી બન્યું હોવાનો ગ્રામજનોમાં રોષ છે.