– વીજ કચેરીએ ગ્રાહકોને નવા મીટરની ચકાસણી માટે બોલાવ્યા

– સ્માર્ટ વીજ મીટર હટાવી જુના મીટર ફરીથી લગાવવા ઉગ્ર માંગ : ગ્રાહકોની લેખિત રજૂઆત વડી કચેરી સુધી પહોંચાડવાની ઇજનેરે ખાત્રી આપી.

સુરેન્દ્રનગર: રાજ્ય સરકારે જૂના વીજ મીટરો કાઢીને તેના સ્થાને નવા સ્માર્ટ પ્રી-પેઈડ વીજ મીટરો લગાવ્યા છે. જેના ભાગરૂપે સુરેન્દ્રનગર અને વઢવાણ શહેરના અનેક વિસ્તારોમાં સ્માર્ટ મીટર લગાવવામાં આવ્યા હતા. પરંતુ પીજીવીસીએલ કચેરી ખાતે વીજ ગ્રાહકોની ઉગ્ર રજૂઆતો અને વિરોધ બાદ સ્માર્ટ વીજ મીટરો નાખવાની કામગીરી બંધ કરી દેવામાં આવી છે. ત્યારે વીજ ગ્રાહકોએ પીજીવીસીએલ કચેરી ખાતે હોબાળો મચાવ્યો હતો કારણ કે જે ગ્રાહકોને ત્યાં સ્માર્ટ મીટર લગાવવામાં આવ્યા છે તેઓને જૂના મીટરો ફરીથી ઇન્સ્ટોલ કરવામાં આવ્યા નથી.

સરકારની સૂચના મુજબ સુરેન્દ્રનગર શહેરના જીનતાન રોડ, જેપી રોડ, 80 ફૂટ રોડ અને જોરાવરનગર અને રતનપર સહિતના શહેરી વિસ્તારોમાં જૂના વીજ મીટરો બદલીને નવા સ્માર્ટ મીટર લગાવવામાં આવ્યા છે. આ સ્માર્ટ મીટરોમાં જૂના મીટરો કરતાં અનેકગણું વીજ બિલ આવતું હોવાની ફરિયાદ કરતાં વીજ ગ્રાહકો અને આગેવાનોએ પીજીવીસીએલ કચેરી ખાતે બેથી ત્રણ વખત ઉગ્ર રજૂઆતો કરી સ્માર્ટ મીટરો નાખવાનો વિરોધ કર્યો હતો.

જેના ભાગરૂપે પીજીવીસીએલ તંત્રએ સ્માર્ટ મીટર લગાવવાનું કામ બંધ કરવાનો નિર્ણય લીધો હતો. સ્માર્ટ મીટર લગાવેલા તમામ વીજ ગ્રાહકોને પીજીવીસીએલ તંત્ર દ્વારા મીટર ચેકીંગ માટે બોલાવવામાં આવ્યા હતા. આથી ત્યાં લગાવવામાં આવેલા નવા સ્માર્ટ મીટરના ગ્રાહકો મોટી સંખ્યામાં પીજીવીસીએલ કચેરીએ ઉમટી પડ્યા હતા અને કાર્યપાલક ઈજનેરને ઉગ્ર રજૂઆતો કરી સ્માર્ટ મીટરો દૂર કરવાની માંગ કરી હતી.

સ્માર્ટ મીટર લગાવ્યા બાદ વધુ બીલ આવતા હોવાનું જણાવી તેમણે ત્યાં લગાવેલા સ્માર્ટ મીટરો દૂર કરી જૂના વીજ મીટરો લગાવવાની માંગણી કરી હતી. આ બાબતે પીજીવીસીએલ કચેરીના કાર્યપાલક ઈજનેરને લેખિત રજૂઆત કરવા જણાવ્યું હતું અને ગ્રાહકોની રજૂઆત વડી કચેરી સુધી પહોંચાડવાની ખાતરી આપી હતી.