અમદાવાદ,
બુધવાર

ગુજરાત સરકારના મંત્રીઓ અને સરકારી કામકાજ માટે અગાઉ ગુજરાત સ્ટેટ એવિએશન ઈન્ફ્રાસ્ટ્રક્ચર કંપની લિમિટેડ (GUJSEL)માં કેપ્ટન તરીકે ફરજ બજાવતા અજય ચૌહાણ સામે ACBએ કેસ નોંધ્યો છે. જેમાં તેણે સત્તાનો દુરુપયોગ કરી પોતાના અંગત ઉપયોગ માટે વિમાન લઈ અનેક પ્રકારની ગેરરીતિ આચરી સરકારી તિજોરીને કુલ 72 લાખનું નુકસાન પહોંચાડ્યું હતું. વધુમાં,
અન્ય રીતે લાખો રૂપિયાનો ભ્રષ્ટાચાર આચરવામાં આવ્યો હતો. આ અંગે એસીબીએ વધુ તપાસ શરૂ કરી છે. એસીબીના ડેપ્યુટી ડાયરેક્ટર જી.વી.પઢેરિયાએ માહિતી આપી હતી કે ગુજસેલમાં અગાઉ ફરજ બજાવતા કેપ્ટન અજય ચૌહાણ સામે ગુજસેલના સુરક્ષા અધિકારી દ્વારા એસીબીમાં ફરિયાદ દાખલ કરવામાં આવી છે. જેમાં અજય ચૌહાણ પર તેમની ફરજ દરમિયાન સરકારી વિમાનનો અંગત ઉપયોગ કરવા અને અન્ય રીતે ભ્રષ્ટાચાર આચરવાનો આરોપ મુકવામાં આવ્યો છે, જેથી સરકારી તિજોરીને કુલ રૂ.72 લાખનું નુકસાન થયું છે. આ અંગે જરૂરી દસ્તાવેજી પુરાવા પણ આપવામાં આવ્યા છે. એ જ રીતે અજય ચૌહાણે ગુજસેલમાં કામ કરવાની સાથે આર્યન એવિએશનમાં સર્વિસ આપીને 47 લાખની કમાણી કરી હતી. વધુમાં,
આઉટસોર્સ્ડ મેન પાવર પૂરી પાડતી કેશમેક એવિએશન પ્રાઈવેટ લિમિટેડના એકાઉન્ટન્ટ અલ્પેશ ત્રિપતિ સાથે મળીને નકલી વાઉચર તૈયાર કરીને 10 લાખ રૂપિયાની રકમ વ્યક્તિગત ખાતામાં ટ્રાન્સફર કરવામાં આવી હતી. આ માટે અજય ચૌહાણે ગુજસેલમાં ખોટો આઉટસોર્સિંગ સ્ટાફ બતાવીને સમગ્ર કૌભાંડ આચર્યું હતું. 2017માં જ્યારે આ આખું કૌભાંડ બહાર આવ્યું ત્યારે સરકારે તેમને ફરજમાંથી મુક્ત કર્યા હતા અને સમગ્ર મામલાની એસીબીમાં તપાસ કરવા સૂચના આપી હતી. વધુમાં, ગુજસેલના એકાઉન્ટન્ટ અલ્પેશ પ્રજાપતિની સંડોવણી પ્રકાશમાં આવી હતી જે અજય ચૌહાણ સાથે મળી હતી. આમ, એસીબીએ અજય ચૌહાણ ઉપરાંત, અલ્પેશ પ્રજાપતિ અને કેશમેક એવિએશન પ્રાઈવેટ લિમિટેડના એકાઉન્ટન્ટ અલ્પેશ ત્રિપાઠી વિરુદ્ધ કેસ નોંધવામાં આવ્યો છે. આ કેસની તપાસ વિશેષ ટીમ દ્વારા કરવામાં આવશે. જેમાં અજય ચૌહાણનું બેંક એકાઉન્ટ, પ્રોપર્ટી અને અન્ય રોકાણો અંગે તપાસ શરૂ કરવામાં આવશે. સૂત્રોના જણાવ્યા અનુસાર પ્રાથમિક તપાસમાં સામે આવ્યું છે કે અજય ચૌહાણે રાજસ્થાનના પાલી જિલ્લામાં કરોડો રૂપિયાનું રોકાણ કર્યું છે.ઉલ્લેખનીય છે કે અજય ચૌહાણે 18 વર્ષ સુધી ગુજરાતના નાગરિક ઉડ્ડયન વિભાગમાં નોકરી કરી હતી. જેમાં તેઓ 13 વર્ષ સુધી ગુજસેલના સીઈઓ તરીકે રહ્યા હતા. આ દરમિયાન સમગ્ર કૌભાંડ આચરવામાં આવ્યું હતું.