છોટા ઉદેપુર સમાચાર: છોટા ઉદેપુર જિલ્લાના તેઝગઢ-ઝોઝ રોડ પર ચાલતા વાહનચાલકો અને સ્થાનિક મુસાફરો માટે ચિંતાજનક સમાચાર પ્રકાશમાં આવ્યા છે. આ માર્ગ પર રેલવે કલ્વર્ટની બાજુમાં લગાવવામાં આવેલ લોખંડનો એંગલ તૂટી ગયો છે, જેના કારણે પુલના એક ભાગને મોટું નુકસાન થયું છે. પુલનો એક ભાગ ક્ષતિગ્રસ્ત હોવાથી આ રોડ પરથી પસાર થતા હજારો વાહનચાલકો અને રોજીંદા મુસાફરોને ભારે હાલાકીનો સામનો કરવો પડી રહ્યો છે.
રેતીથી ભરેલા ભારે વાહનોએ પુલને નબળો પાડ્યો હતો
સ્થાનિક ગ્રામજનોના જણાવ્યા મુજબ છેલ્લા કેટલાક સમયથી આ રોડ પર ક્ષમતા કરતા વધુ વજન ધરાવતા ભારે વાહનોની અવરજવર સતત વધી રહી છે. વધુ પડતા દબાણ અને નદીઓમાંથી રેતી વહન કરતા ભારે વાહનોના ભારણને કારણે પુલની હાલત બદતર થઈ હોવાનું ચર્ચાઈ રહ્યું છે. બ્રિજની સાઈડનો ભાગ ધરાશાયી થઈ જવાથી રસ્તો સાંકડો અને જોખમી બની ગયો છે જેના કારણે રાત્રીના સમયે મોટા અકસ્માતનો ભય સતાવી રહ્યો છે.
જાહેર માર્ગોની દુર્દશા માટે આ વિસ્તારમાં મોટાપાયે રેતી ખનન અને ઝડપી રેતીના ડમ્પરો જવાબદાર હોવાના આક્ષેપ સાથે સ્થાનિક લોકોએ તંત્ર સામે આક્રોશ વ્યક્ત કર્યો હતો. રસ્તાઓ અને પુલો ધરાશાયી થઈ ગયા છે, જેના કારણે સામાન્ય નાગરિકોને હાલાકી ભોગવવી પડી રહી છે અને ઈન્ફ્રાસ્ટ્રક્ચર ભાંગી પડ્યું છે.
તંત્રને રીપેરીંગ કરવા વિનંતી
ગરનાળાનો એંગલ ધરાશાયી થવાની ઘટના બાદ સ્થાનિકોએ સંબંધિત માર્ગ-મકાન વિભાગ અને જિલ્લા વહીવટી તંત્ર સમક્ષ કડક કાર્યવાહીની માંગ કરી છે. બ્રિજના તૂટેલા લોખંડની એંગલ અને ક્ષતિગ્રસ્ત ભાગને તાત્કાલિક રીપેર કરવામાં આવે. માર્ગ સલામતી માટે ભારે વાહનો પર નિયંત્રણો લાદવા જોઈએ, જેથી કોઈ નિર્દોષ નાગરિકનો જીવ ન જાય અને કોઈ અનિચ્છનીય અકસ્માત ન થાય.