અમરેલીમાં નશીલા પદાર્થો ઝડપાયા અમરેલી જિલ્લાના લાઠી તાલુકામાં સ્પેશિયલ ઓપરેશન ગૃપ (SOG) દ્વારા નાર્કોટિક્સ સામે મોટું ઓપરેશન શરૂ કરવામાં આવ્યું છે. લાઠીના ચાવંડ માર્ગ પર આવેલી વાડીમાં દરોડો પાડીને પોલીસે લીલા ગાંજાની ગેરકાયદે ખેતીનો પર્દાફાશ કર્યો છે.
અમરેલી એસઓજીની ટીમને ચોક્કસ બાતમી મળી હતી કે લાઠી-ચાવંડ રોડ પર આવેલ ધીરૂભાઈ કોટડીયા નામના વ્યક્તિના ડાંગરના ખેતરમાં કપાસ કે અન્ય પાકની આડમાં પ્રતિબંધિત ગાંજાની વાવણી કરવામાં આવી છે. આ માહિતીના આધારે પોલીસે ખેતરમાં દરોડો પાડતા ગાંજાના નાના-મોટા કુલ 6 છોડ મળી આવ્યા હતા.
પોલીસે સ્થળ પરથી લગભગ 12 કિલો લીલો ગાંજા જપ્ત કર્યો છે, જેની બજાર કિંમત 6 લાખ રૂપિયાથી વધુ હોવાનો અંદાજ છે. આ ગેરકાયદેસર પ્રવૃતિ બદલ વાડી માલિકની અટકાયત કરી સમગ્ર મુદ્દામાલ જપ્ત કરવામાં આવ્યો છે.
આ મામલે SOG દ્વારા NDPS (નાર્કોટિક ડ્રગ્સ એન્ડ સાયકોટ્રોપિક સબસ્ટન્સ) એક્ટ હેઠળ ગુનો નોંધી કાયદેસરની કાર્યવાહી હાથ ધરવામાં આવી છે. પકડાયેલ આરોપી અને આરોપીઓને વધુ તપાસ માટે લાઠી પોલીસ સ્ટેશનને સોંપવામાં આવ્યા છે. અમરેલી પોલીસની આ કામગીરીથી ડ્રગ્સના વેપારીઓમાં ફફડાટ ફેલાયો છે.