ગુજરાત પોલીસ ડોગને ગોલ્ડ મેડલ મળ્યો ગુજરાત પોલીસના ‘ચેક’ નામના નર કૂતરાએ રાષ્ટ્રીય કક્ષાની સ્પર્ધામાં ગોલ્ડ મેડલ જીતીને પોલીસનું ગૌરવ વધાર્યું છે. તાજેતરમાં મહારાષ્ટ્રના નાગપુર ખાતે યોજાયેલી 69મી ઓલ ઈન્ડિયા પોલીસ ડ્યુટી મીટ ચેમ્પિયનશિપ 2025-26માં ગુજરાત પોલીસના કૂતરા ‘ચેક’ એ બે અલગ-અલગ કેટેગરીમાં ગોલ્ડ અને બ્રોન્ઝ મેડલ જીત્યા હતા.
માર્ચ-એપ્રિલ 2026 દરમિયાન નાગપુરમાં આયોજિત 69મી આવૃત્તિમાં દેશભરમાંથી પોલીસ K9 ટુકડીઓ, ફોરેન્સિક નિષ્ણાતો અને પોલીસ કર્મચારીઓએ ભાગ લીધો હતો. આ સ્પર્ધામાં વિસ્ફોટક અને નાર્કોટિક્સ ડિટેક્શન, ટ્રેકિંગ, ચપળતા અને આજ્ઞાપાલન જેવી ક્ષમતાઓનું પરીક્ષણ કરવામાં આવ્યું હતું.
‘ચેક’ ડોગ અને ડોગ હેન્ડલર રમેશ ખાંટને મેડલથી સન્માનિત કરવામાં આવ્યા હતા
ગુજરાત પોલીસ માટે આ એક ગર્વની ક્ષણ હતી, કારણ કે રાજ્યના પોલીસ ડોગે 16 વર્ષના ગાળા બાદ રાષ્ટ્રીય સ્તરની પોલીસ ડ્યુટી મીટમાં ગોલ્ડ મેડલ જીત્યો હતો. આજે (10 એપ્રિલ, 2026) રાજ્યના પોલીસ વડા (ડીજીપી) કેએલએન રાવે ગાંધીનગરના પોલીસ ભવન ખાતે પોલીસ ડોગ ‘ચેક’, તેના હેન્ડલર રમેશ ખાંટ અને પોલીસ ડોગ ટ્રેનિંગ કન્સલ્ટન્ટ કર્નલ ચંદન સિંહ રાઠોડને આ નોંધપાત્ર સિદ્ધિ બદલ અભિનંદન આપ્યા હતા.
ગુજરાત પોલીસના કુલ છ શ્વાનોએ ત્રણ અલગ-અલગ સ્પર્ધાત્મક કેટેગરીમાં ભાગ લીધો હતો. ટ્રેકિંગ, વિસ્ફોટક શોધ અને નાર્કોટિક્સ ડિટેક્શન જેવી દરેક કેટેગરીમાં બે શ્વાન સ્પર્ધામાં ઉતર્યા હતા.
‘ચેક’ નામના કૂતરાએ ટ્રેકિંગ કેટેગરીમાં ગોલ્ડ મેડલ જીત્યો હતો
ગુજરાત પોલીસના ડોગ ટ્રેનિંગ કન્સલ્ટન્ટ ચંદનસિંહ રાઠોડે જણાવ્યું હતું કે, “ગુજરાત પોલીસના ‘ચેક’ નામના ડોગે ટ્રેકિંગ કેટેગરીમાં ગોલ્ડ મેડલ અને ઓવરઓલ ટ્રેકિંગ કેટેગરીમાં બ્રોન્ઝ મેડલ જીત્યો છે. અમે આ સિદ્ધિ હાંસલ કરવા સખત મહેનત કરી છે.”
વિવિધ રાજ્ય પોલીસ દળો અને અર્ધલશ્કરી એકમોના કુલ 45 કૂતરાઓ ટ્રેકિંગ કેટેગરીમાં ભાગ લીધો હતો. જેમાં ગુજરાત પોલીસનો ‘ચેક’ રમીને ગોલ્ડ જીત્યો હતો.
સમગ્ર ઈવેન્ટમાં વિવિધ કેટેગરીમાં વિવિધ રાજ્ય પોલીસ અને અર્ધલશ્કરી દળોના 200 થી વધુ કૂતરાઓએ ભાગ લીધો હતો. આ રાષ્ટ્રીય સ્પર્ધા પહેલા ગુજરાત પોલીસે વહેલી તૈયારી શરૂ કરી હતી અને મેડલ મેળવવા માટે સતત પ્રયાસો કર્યા હતા.
આ પણ વાંચોઃ અમદાવાદઃ કાસિન્દ્રામાં કારની સીટ પાછળ છુપાયેલો દારૂ, લાખોના મુદ્દામાલ સાથે એકની ધરપકડ
કૂતરાઓની વિશેષ તાલીમ
પસંદ કરાયેલા કૂતરાઓને ખાસ તાલીમ આપવામાં આવી હતી. શ્વાનને કડક તાલીમ શેડ્યૂલ હેઠળ રાખવામાં આવ્યા હતા અને યોગ્ય કાળજી આપવામાં આવી હતી. રાષ્ટ્રીય ચેમ્પિયનશિપ માટે કુલ નવ શ્વાનની પસંદગી કરવામાં આવી હતી, જેમાંથી 6એ વિવિધ ઈવેન્ટમાં ભાગ લીધો હતો.
રાજ્યના વિવિધ જિલ્લાઓમાં લગભગ 160 પોલીસ શ્વાન કાર્યરત છે, જેઓ વિસ્ફોટક શોધ, નાર્કોટીક્સ ડિટેક્શન, ગુનાની તપાસ માટે ટ્રેકિંગ અને આલ્કોહોલ ડિટેક્શન સહિત વિવિધ કામગીરી માટે પ્રશિક્ષિત છે.