અમદાવાદ-મહેસાણા 8-લેન હાઇવે પ્રોજેક્ટ: અમદાવાદ અને ઉત્તર ગુજરાતને જોડતો રાજ્યનો સૌથી વ્યસ્ત માર્ગ હવે પહોળો અને હાઈટેક બનવા જઈ રહ્યો છે. મુખ્યમંત્રીની અધ્યક્ષતામાં મળેલી કેબિનેટની બેઠકમાં અમદાવાદ-મહેસાણા 51 કિલોમીટરના હાઈવેને આઠ-લેન (8-લેન) બનાવવાના ₹2,630 કરોડના મહત્વાકાંક્ષી પ્રોજેક્ટને મંજૂરી આપવામાં આવી છે.
પ્રોજેક્ટની મુખ્ય લાક્ષણિકતાઓ પર એક નજર
કુલ કિંમત: ₹2,630 કરોડ
લંબાઈ: અડાલજથી પાલાવાસણા સર્કલ (મહેસાણા) સુધી કુલ 51.60 કિ.મી.
લેન: મુખ્ય માર્ગ બંને બાજુએ 8-લેન + 7 મીટર પહોળો સર્વિસ રોડ હશે.
અંતિમ તારીખ: ટેન્ડર મંજૂર થયા બાદ 2 વર્ષમાં કામ પૂર્ણ કરવાનો લક્ષ્યાંક.
આનાથી ટ્રાફિકની સમસ્યા દૂર થશે: 1 એલિવેટેડ કોરિડોર અને 8 ફ્લાયઓવર
તાજેતરના સર્વે મુજબ આ હાઈવે પરથી રોજના 1 લાખથી વધુ વાહનો પસાર થાય છે. ટ્રાફિકનું ભારણ ઘટાડવા સરકાર આધુનિક ઈન્ફ્રાસ્ટ્રક્ચર તૈયાર કરશે.
કલોલમાં એલિવેટેડ કોરિડોર: કલોલ શહેરના ટ્રાફિકને બાયપાસ કરવા માટે 6.10 કિલોમીટર લાંબો એલિવેટેડ કોરિડોર હશે, જે શહેરના 5 ફ્લાયઓવરને જોડશે.
નવા ફ્લાયઓવર: શેરથા (2), રાજપુર ભસરિયા, જગુદણ અને મેવાડ ખાતે કુલ 6 નવા ફ્લાયઓવર બનાવવામાં આવશે. જ્યારે કલોલ અને છત્રાલમાં વધારાનો 4 લેનનો ફ્લાયઓવર તૈયાર કરવામાં આવશે.
અંડરપાસ: શેરથા, IFFCO કલોલ, કલોલ શહેર, છત્રાલ, નંદાસણ અને ગણેશપુરા સહિત કુલ 8 સ્થળોએ અંડરપાસ બનાવવામાં આવશે.
નવું ROB: કલોલ ખાતે હાલના રેલવે ઓવરબ્રિજને અડીને નવો 4 લેનનો બ્રિજ બનાવવામાં આવશે.
આ પણ વાંચોઃ ગુજરાત સહકારી મંડળીની ચૂંટણી આગામી 6 મહિના માટે મુલતવી, SIRને પગલે સરકારના નિર્ણય
કોને ફાયદો થશે?
આ પ્રોજેક્ટ પૂર્ણ થવાથી મહેસાણા, પાટણ અને બનાસકાંઠા જિલ્લાના લાખો લોકોને સીધો ફાયદો થશે. અમદાવાદથી આવતા-જતા મુસાફરોનો સમય બચશે અને વાહનવ્યવહાર વધુ સુરક્ષિત રહેશે.
આ પ્રોજેક્ટ માટે ટૂંક સમયમાં ટેન્ડરો બહાર પાડવામાં આવશે. વર્ષ 1999માં આ રોડને 4-લેન બનાવવામાં આવ્યો હતો, જે હવે વધતી જતી વાહનોની સંખ્યાને કારણે 8-લેન કરવામાં આવી રહ્યો છે, એમ પ્રવક્તા મંત્રીએ જણાવ્યું હતું.
