બારડોલીમાં આગ રાજ્યમાં આગની ઘટનાઓ સતત વધી રહી છે ત્યારે સુરત જિલ્લાના બારડોલીમાં આગની મોટી દુર્ઘટના પ્રકાશમાં આવી છે. બારડોલી વિસ્તારમાં આવેલા 11થી વધુ ભંગારના ગોડાઉનમાં અચાનક ભીષણ આગ ફાટી નીકળતાં અરાજકતા ફેલાઈ ગઈ હતી.
પ્રાપ્ત માહિતી અનુસાર, ગોડાઉનમાં પ્લાસ્ટિકનો મોટો જથ્થો અને ભંગાર ભરાયો હતો અને આગએ વિકરાળ સ્વરૂપ ધારણ કરી લીધું હતું. આગની ભયાનકતા એટલી બધી હતી કે તેના ધુમાડાના ગોટેગોટા 2 કિલોમીટર દૂરથી સ્પષ્ટ જોઈ શકાતા હતા. આગ લાગતાની સાથે જ આસપાસના વિસ્તારમાં દોડધામ મચી ગઈ હતી.
/filters:format(webp)/indian-express-gujarati/media/media_files/2026/07/10/surat-city-collector-2026-07-10-18-51-16.jpg?w=100&fit=100,100&ssl=1 "સુરત શહેરમાં પૂર રાહત સહાય")
ઘટનાની ગંભીરતાને ધ્યાનમાં લઈને પ્રાંત અધિકારી દ્વારા તેને ‘મુખ્ય કોલ’ જાહેર કરવામાં આવ્યો છે. ફાયર વિભાગની 15 થી વધુ ગાડીઓ તાત્કાલીક ઘટનાસ્થળે પહોંચી ગઈ હતી અને પાણીની તોપો વડે યુદ્ધના ધોરણે આગને કાબુમાં લેવાનું શરૂ કર્યું હતું. જોકે, પ્લાસ્ટિકનો સામાન ભરપૂર હોવાથી આગ પર કાબૂ મેળવવામાં ફાયરના જવાનોને ભારે મુશ્કેલી પડી રહી છે.
ઘટનાની જાણ થતાં સ્થાનિક પોલીસ અને ઉચ્ચ અધિકારીઓનો કાફલો પણ ઘટનાસ્થળે પહોંચી ગયો હતો અને સુરક્ષા વ્યવસ્થા સંભાળી લીધી હતી. રાહતના સમાચાર એ છે કે આ ભીષણ આગની ઘટનામાં હજુ સુધી કોઈ જાનહાનિના અહેવાલ નથી.