સુરત : સુરત મહાનગરપાલિકા શહેર વિકાસના દાવાઓ અને મીટીંગોના શોમાં વ્યસ્ત છે, જ્યારે જમીન પરની વાસ્તવિક્તા સાવ વિપરીત દેખાઈ રહી છે. શહેરના મુખ્ય માર્ગો પર મોટા બિલ્ડરો અને પ્રોજેકટ ધારકો પોતાની જાગીર તરીકે જાહેર માર્ગ પર લોખંડ, રેતી અને બાંધકામ સામગ્રીના ઢગલા ખતરનાક રીતે ઠાલવી રહ્યા છે. સામાન્ય નાગરિકોને રોડ પર નાની-મોટી ચીજવસ્તુઓ મુકવા બદલ તાત્કાલિક દંડ વસૂલતું તંત્ર મોટા માથાઓ સામે મૌન બની ગયું હોવાનો આક્ષેપ થઈ રહ્યો છે. દરરોજ હજારો વાહનો પસાર થતા માર્ગો પર અકસ્માતોને આમંત્રણ આપતી આ સ્થિતિ છતાં અધિકારીઓ મીટીંગોમાં વ્યસ્ત હોવાથી લોકોના જીવ જોખમમાં મુકાયા છે.
સુરત મ્યુનિસિપલ પ્રશાસન ICCCના એસી હોલમાં સતત મિટિંગ, પ્રેઝન્ટેશન અને રિવ્યુ સેશનમાં વ્યસ્ત હોવાનું દર્શાવી રહ્યું છે, મ્યુનિસિપલ ઓફિસને બાજુ પર મૂકીને રોડ પર શહેરની વાસ્તવિકતા સાવ જુદી જ છે. શહેરના ઘણા રસ્તાઓ પર રોડ બિલ્ડરોનો કબજો છે, જ્યાં હજારો વાહનો મુખ્ય માર્ગ પરથી પસાર થાય છે. આ રોડ પર બાંધકામનો સામાન જોખમી રીતે મુકવામાં આવી રહ્યો છે, જાણે કે તે બિલ્ડરની નહીં પણ રોડ નગરપાલિકાની માલિકીનો હોય.
મ્યુનિસિપલ તંત્ર સતત મીટીંગોમાં વ્યસ્ત હોવાથી જાહેર માર્ગ પર જ જોખમી રીતે કરવતનું કટિંગ કરવામાં આવી રહ્યું છે. આ કટીંગની બાજુમાંથી હજારો વાહનો પસાર થાય છે. આવા સંજોગોમાં જો અકસ્માત થાય કે વાહન સ્લીપ થાય તો રસ્તા પર મુકવામાં આવેલ ખાડા અને કટીંગ ઓજારો કોઈપણનો જીવ લઈ શકે છે. લોકોમાં સૌથી મોટો પ્રશ્ન એ છે કે નગરપાલિકાના નિયમો સામાન્ય નાગરિકો માટે જ છે? એક નાનો વેપારી દુકાનની સામે સિમેન્ટની બે થેલીઓ મૂકે છે, કોઈ લારી ચાલક કોઈ સામાન મૂકે છે અથવા કોઈ સામાન્ય માણસ રસ્તાના કિનારે માલ ઉતારે છે, તાત્કાલિક દંડ, જપ્તી અને કડક પગલાં લેવામાં આવે છે.
પરંતુ કરોડોના પ્રોજેકટ ધરાવતા બિલ્ડરો જાહેર માર્ગો પર કબજો કરે, જોખમી રીતે માલસામાન મુકે, વાહનવ્યવહાર અટકાવે તો નગરપાલિકા તંત્ર કંઈ કરતું નથી તેથી પાલિકાની બેવડી નીતિ હોવાનું કહેવાય છે. શહેરના અનેક વિસ્તારોમાં રોડ કિનારે બાંધકામ મટીરીયલના કારણે વાહનવ્યવહાર ધીમો પડી રહ્યો છે. જેમ જેમ વરસાદી ઋતુ નજીક આવી રહી છે તેમ તેમ રસ્તા પર રેતી-કાદવ ફેલાતા વધુ ભય સર્જાશે તેવી પણ ચિંતા વ્યક્ત કરવામાં આવી રહી છે. નગરપાલિકાના અધિકારીઓ એરકન્ડિશન્ડ હોલમાં મીટીંગો ચાલુ રાખતા હોવાનો લોકોમાં ચકચાર જાગી છે અને મેદાનમાં જાહેર સલામતી ભગવાન પર છોડી દેવામાં આવી છે. બીજી તરફ મોટા પ્રોજેકટ માલિકો અકસ્માતો સર્જાય તે રીતે રોડ પર મટીરીયલ્સ મુકીને પાલિકાને પડકાર ફેંકતા હોય તેવી સ્થિતિ છે.