સુરાઃ સમગ્ર મામલો શિક્ષણ વર્તુળોમાં ચર્ચાનો વિષય બન્યો છે કારણ કે સ્પર્ધા પૂર્ણ થયાના 14 દિવસ બાદ ફેબ્રુઆરી માસમાં સુરત નગર પ્રાથમિક શિક્ષણ સમિતિ દ્વારા આયોજિત રમતોત્સવના વિજેતા વિદ્યાર્થીઓને ઇનામ વિતરણ કરવામાં આવશે. આવતીકાલે, શુક્રવાર, 6 માર્ચે પાલિકાના પંડિત દિનદયાળ ઉપાધ્યાય ઇન્ડોર સ્ટેડિયમ ખાતે ઇનામ વિતરણ સમારોહ યોજાશે, જેમાં વિજેતા ખેલાડીઓને ટ્રોફી અને ઇનામ એનાયત કરવામાં આવશે. જો કે આ કાર્યક્રમમાં શાળાના 50 ટકા શિક્ષકોને ફરજીયાત હાજર રહેવા સુચના અપાતા શિક્ષણ સમિતિની અનેક શાળાઓમાં ફરી એકવાર શિક્ષકોની ઘટ સર્જાવાની શકયતા વ્યક્ત કરવામાં આવી રહી છે.
સુરત નગર પ્રાથમિક શિક્ષણ સમિતિમાં શિક્ષકોની પહેલેથી જ અછતના કારણે શિક્ષકો પર બિન શૈક્ષણિક કાર્યનું ભારણ સતત વધી રહ્યું છે. જેના કારણે શિક્ષણ પર નકારાત્મક અસર પડી હોવાના આક્ષેપો થયા છે. હાલમાં બોર્ડની પરીક્ષાઓ ચાલી રહી છે અને આ પરીક્ષાઓ માટે સમિતિના 600 થી વધુ શિક્ષકોને વિવિધ ફરજો સોંપવામાં આવી છે. પરીક્ષાની કામગીરી વચ્ચે અન્ય બિન-શૈક્ષણિક પ્રવૃતિઓનું વધતું ભારણ શિક્ષકો માટે મુશ્કેલી ઉભી કરી રહ્યું છે.
આ પરિસ્થિતિ વચ્ચે શિક્ષણ સમિતિ દ્વારા ફેબ્રુઆરી માસમાં રમતોત્સવનું આયોજન કરવામાં આવ્યું હતું. 10 ફેબ્રુઆરીથી 20 ફેબ્રુઆરી દરમિયાન યોજાયેલા આ રમતોત્સવમાં શહેરની પ્રાથમિક શાળાના હજારો વિદ્યાર્થીઓએ ઉત્સાહભેર ભાગ લીધો હતો.વિવિધ રમત-ગમતની સ્પર્ધાઓ યોજાઈ હતી અને વિજેતા વિદ્યાર્થીઓને પણ જાહેર કરવામાં આવ્યા હતા. પરંતુ સ્પર્ધા પૂર્ણ થયા બાદ તરત જ ઇનામ વિતરણ કરવામાં આવ્યું ન હતું.
હવે રમતોત્સવ પૂર્ણ થયા બાદ લગભગ 14 દિવસ બાદ આવતીકાલે 6 માર્ચના રોજ ઇનામ વિતરણ સમારોહનું આયોજન કરવામાં આવ્યું છે.નગરપાલિકાના પંડિત દિનદયાળ ઉપાધ્યાય ઇન્ડોર સ્ટેડિયમ ખાતે યોજાનાર આ કાર્યક્રમમાં 50 ટકા શાળાના શિક્ષકોને હાજર રહેવા શિક્ષણ સમિતિએ સૂચના આપી છે. જેના કારણે ઘણી શાળાઓમાં શિક્ષકોની સંખ્યા ઓછી હશે અને તેના કારણે વર્ગખંડોમાં ભણતરને અસર થવાની સંભાવના વ્યક્ત કરવામાં આવી રહી છે.
આમ, રમતોત્સવ પૂર્ણ થયાના લાંબા સમય બાદ ઇનામ વિતરણનું આયોજન અને શિક્ષકો માટે હાજરી ફરજિયાત કરવાનો નિર્ણય શિક્ષણ વર્તુળોમાં ચર્ચાનો વિષય બન્યો છે. શિક્ષકો કહે છે કે પહેલેથી જ ભારે પરીક્ષાઓ અને અન્ય બિન-શૈક્ષણિક પ્રવૃત્તિઓના ભારણ વચ્ચે આવા કાર્યક્રમોમાં ફરજિયાત હાજરી શૈક્ષણિક પ્રદર્શનને અસર કરે છે.