સુરત કોર્પોરેશન: સુરત નગરપાલિકા દ્વારા ચાલુ નાણાકીય વર્ષમાં પ્રસ્તાવિત 4121 કરોડના કેપિટલ કામો માટે રાજ્ય અને કેન્દ્ર સરકાર પાસે સતત ગ્રાન્ટની માંગ કરવામાં આવી રહી છે. આ માટે સુરત પાલિકાએ રાજ્ય સરકાર પાસે 3365 કરોડની ગ્રાન્ટની માંગણી કરી છે. એક તરફ પાલિકા સરકાર પાસે પાયાની સુવિધાઓ અને વિવિધ પ્રોજેક્ટ માટે ગ્રાન્ટની માંગ કરી રહી છે તો બીજી તરફ પાલિકાના વિવિધ કાર્યક્રમો પાછળ કરોડો રૂપિયાનો ખર્ચ કરવામાં આવી રહ્યો છે. જેના કારણે પાલિકાને પ્રોજેક્ટની સાથે વિવિધ કાર્યક્રમો માટે ગ્રાન્ટ લેવી પડે તો નવાઈ નહીં.
સુરત મહાનગરપાલિકા છેલ્લા કેટલાક સમયથી આ વિસ્તારમાં લોકાર્પણ, ખાત મુર્હુત, વિવિધ યાત્રાઓનું આયોજન કરી રહી છે. પરંતુ કાર્યક્રમ એટલો ભવ્ય છે કે નાના કાર્યક્રમ માટે પણ પાલિકા લાખો કે કરોડો રૂપિયાનો ખર્ચ કરે છે. સુરત મહાનગરપાલિકાએ ત્રણ વર્ષમાં વિવિધ કાર્યક્રમો પાછળ 8.35 કરોડનો ખર્ચ માત્ર મંડપ પર કર્યો છે. ત્રણ વર્ષમાં આ ખર્ચ માત્ર કાર્યક્રમ માટેના મંડપનો છે, ત્યાર બાદ સાઉન્ડ, લાઈટ, ડેકોરેશન સહિતના અનેક ખર્ચ થયા છે અને આંકડો પણ મોટો છે. નગરપાલિકા કરોડો રૂપિયાનો ખર્ચ કરે છે પરંતુ લોકો એકઠા ન થતા હોવાથી શાળાના બાળકો કે કર્મચારીઓને ભીડ જેવો માહોલ બનાવવો પડે છે.
સુરત મહાનગરપાલિકા પાસેથી પ્રાપ્ત માહિતી અનુસાર વર્ષ 2021-22માં 1.35 કરોડ, વર્ષ 2022-23માં 1.97 કરોડ અને વર્ષ 2023-24 દરમિયાન પાંચ કરોડથી વધુનો મંડપ સેવા પાછળ ખર્ચ કરવામાં આવ્યો હતો. ત્રણ નાણાકીય વર્ષમાં મંડપ સેવા માટે પાલિકાના ચોપડામાં 8.35 કરોડનો ખર્ચ કરવામાં આવ્યો છે. પાલિકા વિવિધ કાર્યક્રમો પાછળ આડેધડ ખર્ચ કરે છે. બીજી તરફ પ્રોજેક્ટ માટે ગ્રાન્ટ માંગવામાં આવે છે. જેથી હવે તેઓ આ કાર્યક્રમ માટે પણ ગ્રાન્ટ માંગે તો નવાઈ નહી હોય તેવી ચર્ચા છે.