સુરત ફાયર બ્રિગેડ: ચાલી રહેલા રમઝાન માસની ઉજવણીના ઉત્સાહમાં કેટલાક લોકોએ નગરપાલિકાની ઇમરજન્સી સેવાઓ સામે અડચણ ઉભી કરી હતી. મ્યુનિસિપલ ઓફિસ પાસે આવેલી મસ્જિદમાં વહેલી સવારની નમાજ માટે આવેલા કેટલાક લોકોએ પોતાના વાહનો ફાયર એન્જિનની સામે પાર્ક કર્યા હતા. આ સમયે કતારગામ વિસ્તારમાં આગનો કોલ આવ્યો હતો, પરંતુ આડેધડ પાર્કિંગના કારણે ફાયરના વાહનો બહાર ન જઈ શકતા અન્ય જગ્યાએથી વાહનો મોકલવાની ફરજ પડી હતી. આવી પરિસ્થિતિ ન સર્જાય તે માટે આયોજન કરવા સાથે આડેધડ વાહનો પાર્ક કરનારાઓ સામે કાર્યવાહી કરવા માંગ ઉઠી છે.
ચાલી રહેલા રમઝાન માસ દરમિયાન રાજમાર્ગમાં અડચણ ઉભી થતા દબાણોની ફરિયાદનો ઉકેલ આવ્યો નથી. ત્યારે સુરત શહેર માટે અતિસંવેદનશીલ ગણાતા ફાયર વિભાગની કામગીરી સામે કેટલાક તત્વોએ અડચણ ઉભી કરી હોવાની ગંભીર ફરિયાદ બહાર આવી છે. એક મસ્જિદ (દરગાહ) સુરત મ્યુનિસિપાલિટીની મુખ્ય કચેરી, મુગલસરાયની ઓફિસની બાજુમાં છે. આજે સવારે પાંચ વાગ્યે ઘણા લોકો નમાઝ માટે ત્યાં પહોંચ્યા હતા. અહીં આવેલા લોકોએ પોતાના વાહનો નગરપાલિકાના ફાયર વાહનોની સામે આડેધડ પાર્ક કરી દીધા હતા.
દરમિયાન આજે વહેલી સવારે કતારગામ વિસ્તારમાં એક સ્થળે આગનો કોલ આવ્યો હતો અને આ વિસ્તાર મુગલસરાથી નજીક હોવાથી ફાયરના જવાનો તાબડતોબ વાહનો સાથે પહોચી ગયા હતા, આજુબાજુ તમામ જગ્યાએ ટુ-વ્હીલર હતા. જેના કારણે આ સ્થળેથી ફાયરની ગાડીઓ બહાર આવી શકી ન હતી અને અન્ય સ્થળેથી વાહન મોકલીને આગને કાબુમાં લેવી પડી હતી. સદનસીબે આગ નાની હતી જેથી કોઈ જાનહાનિ થઈ ન હતી, પરંતુ જો કોઈ મોટી ઘટના બને અને આવી સ્થિતિ સર્જાય તો આગ વધુ પ્રસરે અને કોઈનો જીવ જાય તેવી શક્યતા નકારી શકાય તેમ નથી.
હાલમાં રમઝાન માસ ઉપરાંત શુક્રવારના દિવસે પણ આવી સ્થિતિનું નિર્માણ થાય છે અને આ જગ્યા સિવાય રોડ પર વાહનો પણ પાર્ક કરવામાં આવતા હોવાથી ટ્રાફિકની સમસ્યા સાથે ફાયરના સાધનો પણ જઈ શકતા નથી. જેથી હવે મુગલીસરાય ખાતે ફાયર વિભાગના અધિકારીએ આગેવાનો સાથે બેઠક કરી આવી સ્થિતિ ફરી ન બને તે માટે સૂચનાઓ આપી હતી.