સુરત કોર્પોરેશન: સુરત પાલિકાના નવા હોદ્દેદારોની નિમણૂક માટે કાઉન્ટડાઉન શરૂ થતાં જ ભાજપના રાજકારણમાં ભારે ઉથલપાથલ જોવા મળી રહી છે. સુરતના મેયર, ડેપ્યુટી મેયર, સ્ટેન્ડિંગ કમિટી ચેરમેન સહિતના મહત્વના હોદ્દા માટે દાવેદારોની લાંબી લાઇન છે. બીજી તરફ ભાજપના આંતરિક જૂથબંધી અને વગદાર આગેવાનો પોતાના મનાતા કોર્પોરેટરોને હોદ્દો અપાવવા માટે સક્રિય બન્યા છે, ત્યારે જોરદાર આંતરીક જંગ શરૂ થયો છે. મેયર સહિતના પદાધિકારીઓ માટે અનેક નામો હોટ ફેવરિટ ગણાય છે. પરંતુ સુરત ભાજપ માટે પ્રાયોગિક શાળા છે, તેથી ચર્ચાસ્પદ નામોની જગ્યાએ સ્કાયલેબ જેવા નામો મૂકવામાં આવે તો નવાઈ નહીં, પરંતુ ભાજપના વર્તુળમાં જ ચર્ચા શરૂ થઈ ગઈ છે.
સુરત મહાનગરપાલિકાની ચૂંટણીમાં ભાજપે રેકોર્ડ બ્રેક 115 બેઠકો જીતીને ઈતિહાસ રચ્યો છે. પરંતુ હવે આ જંગી બહુમતી ભાજપ માટે આંતરિક અસંતોષનું કારણ બની રહી છે. મોટી સંખ્યામાં ચૂંટાયેલા કોર્પોરેટરો વિવિધ હોદ્દા માટે દાવેદારી કરી રહ્યા છે. નવા ચહેરાઓ અનુભવના આધારે તકો શોધી રહ્યા છે, ત્યારે જૂના નેતાઓએ તેમનું રાજકીય વજન બતાવી દીધું છે અને મહત્વની જવાબદારીઓ મેળવવા ફરી સક્રિય બન્યા છે. ભાજપના વિવિધ જૂથો વચ્ચે ચાલી રહેલું આંતરિક રાજકારણ હવે ખુલ્લી ચર્ચાનો વિષય બન્યું છે. દરેક જૂથ પોતાના ટેકેદારને મેયર કે સ્ટેન્ડિંગ કમિટીના ચેરમેન પદ પર લાવવા માટે સંગઠન અને હાઈકમાન્ડ સમક્ષ દોડધામ કરી રહ્યું છે. ભાજપ દ્વારા પદાધિકારીઓની પસંદગી પહેલા હાથ ધરવામાં આવેલી સેન્સ પ્રક્રિયાને લઈને પણ કેટલાક સવાલો ઉઠી રહ્યા છે. પાર્ટીના જ કેટલાક વર્તુળોમાં એવી ચર્ચા છે કે સેન્સ પ્રક્રિયા માત્ર એક ઔપચારિકતા હતી. સેન્સ બાદ મળેલી સંકલન બેઠક અને પાર્લામેન્ટરી બોર્ડની બેઠકમાં પણ એક પણ નામ પર સર્વાનુમતે મહોર મારી શકાઈ નથી. મેયર સહિતના મહત્વના પદો માટે અનેક નામો માટે લાંબી ચર્ચા અને રાજકીય ગણતરી ચાલી રહી છે. જેના કારણે સમગ્ર પ્રક્રિયા વધુ ગૂંચવણભરી બની છે.
જૂથવાદ અને આંતરિક અસંતોષને ટાળવા માટે ભાજપ હાઈકમાન્ડ આ વખતે છેલ્લી ઘડીનું સંતુલન જાળવી રાખે તેવી શક્યતા છે. હોદ્દેદારોની પસંદગી જાતિ સમીકરણ, વિસ્તારનું પ્રતિનિધિત્વ, સંગઠન પ્રત્યેની વફાદારી અને જૂથોમાં સંતુલન જેવા મુદ્દાઓને ધ્યાનમાં રાખીને કરવામાં આવી શકે છે.
ભાજપમાં આંતરિક ગોઠવણો, જૂથવાદ અને દાવેદારોની ઉછાળા વચ્ચે હવે તમામની નજર આગામી દિવસોમાં જાહેર થનાર પદાધિકારીઓની યાદી પર મંડાયેલી છે. એવું કહેવાય છે કે, છેલ્લી ઘડીએ હાઈકમાન્ડ આશ્ચર્યજનક અને અત્યાર સુધી સાંભળ્યા ન હોય તેવા ચહેરાઓને તક આપે તેવી શક્યતા છે. જેના કારણે સુરત ભાજપમાં સસ્પેન્સ, અટકળો અને રાજકીય ગરમાવો ચરમસીમાએ પહોંચ્યો છે. જેના કારણે મેયર કોણ બનશે, સ્થાયી સમિતિની જવાબદારી કોની રહેશે અને અન્ય સમિતિઓમાં કોને મહત્વ આપવામાં આવશે તે અંગે ભાજપના વર્તુળોમાં અનેક ચર્ચાઓ શરૂ થઈ છે.