સુરત : સુરતીઓના પિકનિક ડેસ્ટિનેશન એવા ડુમસ સી ફેઝ પ્રોજેક્ટના લોકાર્પણ બાદ હવે સુરતીઓના ડુમસ સી ફેઝની મજા બમણી કરવા એસી ડબલ ડેકર બસ શરૂ કરવાની યોજના છે. સ્ટેન્ડિંગ કમિટીએ ડુમસ સી ફેઝના મુલાકાતીઓ માટે બે ઇલેક્ટ્રિક ડબલ-ડેકર એસી બસોની જોગવાઈને લીલી ઝંડી આપી દીધી છે. હવે નજીકના ભવિષ્યમાં બે ઈલેક્ટ્રિક એસી ડબલ ડેકર બસ ખરીદવાની કવાયત પણ શરૂ થઈ ગઈ છે.
સુરત શહેરમાં વર્ષો પહેલા રેલવે સ્ટેશનથી મોરાભાગલ અને અન્ય રૂટ પર ડબલ ડેકર બસો દોડતી હતી. પરંતુ ત્યારબાદ ટ્રાફિકની સમસ્યાના કારણે ડબલ ડેકર બસ સેવા બંધ કરી દેવામાં આવી હતી. વર્ષો પહેલા ઘણા સુરતીઓ ડબલ ડેકરની મજા લેતા હતા પરંતુ હવે ડીઝલ ડબલ ડેકર જે સુરતીઓ માટે ભૂતકાળ બની ગયું છે તેની જગ્યાએ ઈલેક્ટ્રીક એ.સી. ડબલ ડેકર બસ સુરતીઓ માટે જોવાલાયક બનવા જઈ રહી છે.
તાજેતરની સ્થાયી સમિતિની બેઠકમાં સુરત શહેર માટે જાહેર પરિવહન સુવિધા માટે 2 ડબલ ડેકર એ.સી. 10 વર્ષના વ્યાપક વાર્ષિક મેન્ટેનન્સ કોન્ટ્રાક્ટ સાથે ઇલેક્ટ્રિક બસ ડ્રાઇવરને ખરીદવાની દરખાસ્તને લીલીઝંડી આપવામાં આવી છે. ગુજરાત સ્ટેટ રોડ ટ્રાન્સપોર્ટ કોર્પોરેશને સ્વિચ મોબિલિટી ઓટોમોટિવ લિમિટેડ, ચેન્નાઈને ડ્રાઈવર સહિત 10 વર્ષની વ્યાપક જાળવણીની પ્રાપ્તિ માટે વર્ક ઓર્ડર જારી કર્યો છે. સુરત મ્યુનિસિપલ કોર્પોરેશન માટે તે કિંમત અને શરત પર 02 ડબલ ડેકર એ.સી. ઇલેક્ટ્રિક બસ ખરીદવા અને અન્ય કામગીરી માટે મ્યુનિસિપલ. કમિશનરને અધિકૃત કરવામાં આવેલ છે.
જો કે, ગોપી તળાવ પ્રોજેક્ટ શરૂ થયો ત્યારે મુલાકાતીઓ માટે ડબલ ડેકરની જાહેરાત કરવામાં આવી હતી પરંતુ તે આજદિન સુધી શરૂ કરવામાં આવી નથી. હવે પાલિકાએ સુરતીઓના પિકનિક હોટ ડેસ્ટિનેશન ડુમસ સી ફેઝ પ્રોજેક્ટ માટે બે એસી ડબલ ડેકર બસો શરૂ કરવાની કવાયત શરૂ કરી છે. આ પ્રોજેક્ટ માટે ડબલ ડેકર બસ શરૂ થશે કે પછી ગોપી તળાવ પ્રોજેક્ટની જેમ ફાઈલમાંથી ડબલ ડેકર બહાર આવશે તે તો સમય જ કહેશે.
હાલમાં સ્થાયી સમિતિએ લીલી ઝંડી આપ્યા બાદ ડબલ ડેકર માટે કવાયત શરૂ કરી છે. જેના કારણે આ સ્થળે દર્શનાર્થીઓની મજા બમણી થઈ જશે.