GSEB SSC પરિણામ 2026: ગુજરાત માધ્યમિક અને ઉચ્ચતર માધ્યમિક શિક્ષણ બોર્ડ, ગાંધીનગર દ્વારા માર્ચ-2026માં લેવાયેલી ધોરણ-10 (SSC) અને સંસ્કૃત પ્રથમાની પરીક્ષાનું પરિણામ ગત 6 મેના રોજ જાહેર કરવામાં આવ્યું હતું. તેથી જે વિદ્યાર્થીઓ તેમના પરિણામથી સંતુષ્ટ નથી અથવા જેઓ તેમના માર્કસની પુનઃ ચકાસણી કરાવવા માગે છે, તેઓ બોર્ડની સત્તાવાર વેબસાઇટ પરથી રિચેકિંગ માટે અરજી કરી શકે છે.
પરીક્ષામાં બેસવા માંગતા ઉમેદવારોએ બોર્ડની વેબસાઈટ gseb.org પર જઈને ઓનલાઈન રજીસ્ટ્રેશન કરાવવું પડશે. જેમાં 8મી મે 2026થી અરજી પ્રક્રિયા શરૂ થઈ છે અને વિદ્યાર્થીઓ 15મી મે 2026ના સાંજે 5 વાગ્યા સુધી ફોર્મ ભરી શકશે. નોંધનીય છે કે મૂલ્યાંકન માટેની અરજી માત્ર ઓનલાઈન મોડથી જ સ્વીકારવામાં આવશે. અન્ય કોઈપણ રીતે કરવામાં આવેલી અરજીઓ ધ્યાનમાં લેવામાં આવશે નહીં.
નિયત અરજી ફીની ચુકવણી પણ ઓનલાઈન કરવાની રહેશે. વિદ્યાર્થીઓ SBI ePay સિસ્ટમ દ્વારા ક્રેડિટ કાર્ડ, ડેબિટ કાર્ડ અથવા નેટ બેંકિંગ દ્વારા ફી ચૂકવી શકે છે. ઉપરાંત, જો કોઈ વિદ્યાર્થી રોકડ દ્વારા ફી ચૂકવવા માંગે છે, તો તેઓ “SBI શાખા ચુકવણી” વિકલ્પ પસંદ કરીને દેશની કોઈપણ SBI શાખામાં ફી જમા કરી શકે છે. બોર્ડના સેક્રેટરી દ્વારા તમામ આચાર્યો, વાલીઓ અને વિદ્યાર્થીઓને આ સમયમર્યાદામાં જરૂરી કાર્યવાહી પૂર્ણ કરવા જણાવવામાં આવ્યું છે.
આ પણ વાંચો: ગુજરાત બોર્ડના ધોરણ 10નું પરિણામ 83.86% જાહેર, 35508 વિદ્યાર્થીઓ A1 ગ્રેડ, સૌથી વધુ પરિણામ 90.85% સાથે નર્મદા જિલ્લો ટોપ
ધોરણ 10નું 83.86% પરિણામ
ગત 4 મેના રોજ ધોરણ 12 વિજ્ઞાન અને સામાન્ય પ્રવાહનું પરિણામ જાહેર કર્યા બાદ ગુજરાત બોર્ડ દ્વારા 6 મેના રોજ સવારે 8 વાગ્યે ધોરણ 10નું પરિણામ પણ જાહેર કરવામાં આવ્યું હતું. આ વખતે SSCનું કુલ પરિણામ 83.86% છે.