વડોદરા અકસ્માત: વડોદરાના નેશનલ હાઇવે 48 પર સુંદરપુરા પાસે આજે સવારે (14 એપ્રિલ) સવારે એક ભયાનક અકસ્માત સર્જાયો હતો. રોંગ સાઇડમાં આવતાં બાઇક રોડ ક્રોસ કરતી કાર સાથે અથડાઇ હતી. જે બાદ બાઇક સવાર યુવકનું ઘટના સ્થળે જ મોત નીપજ્યું હતું જ્યારે પાછળ બેઠેલી મહિલા અને બાળક ઘાયલ થયા હતા.
રોંગ સાઇડમાં કાર ચલાવવાની બેદરકારી
અકસ્માત અંગે DCP ઝોન 3 અભિષેક ગુપ્તાએ જણાવ્યું હતું કે, આ ઘટના સવારે આંબા ચોકડી પાસે GEB કટ પાસે બની હતી. એક કાર રોંગ સાઈડથી આવી રહી હતી અને કટ ક્રોસ કરીને વિરુદ્ધ દિશામાં જવાનો પ્રયાસ કરી રહી હતી. દરમિયાન બાઇક પર સવાર ત્રણ વ્યક્તિઓ સીધી કાર સાથે અથડાઇ હતી. ટક્કર એટલી જોરદાર હતી કે બાઇક ચાલકનું ઘટનાસ્થળે જ મોત નીપજ્યું હતું.
આ પણ વાંચોઃ ચૂંટણી પ્રચારમાં નેતાઓની બયાનબાજીઃ BJP MLAએ કહ્યું- શું તમે તમારા પિતાના પૈસાથી વિકાસ કરશો?
ઘાયલો હોસ્પિટલમાં સારવાર હેઠળ છે
બાઇક પર સવાર અન્ય બે વ્યક્તિઓ (એક મહિલા અને એક બાળક)ને ગંભીર ઇજાઓ પહોંચી હતી. સ્થાનિકોએ આક્ષેપ કર્યો હતો કે એમ્બ્યુલન્સ મોડી પહોંચી હતી, પરંતુ બાદમાં ઇજાગ્રસ્તોને તાત્કાલિક વડોદરા હોસ્પિટલમાં સારવાર માટે ખસેડવામાં આવ્યા હતા. કાર ચાલકને પણ સામાન્ય ઈજાઓ થઈ છે અને તેની હોસ્પિટલમાં સારવાર ચાલી રહી છે.
રોષે ભરાયેલા લોકોએ હાઇવે પર ચક્કાજામ કર્યો
અકસ્માત બાદ અંદાજે 2 કલાક સુધી મૃતદેહ હાઈવે પર પડયો હતો અને એમ્બ્યુલન્સ મોડી પહોંચતા લોકોમાં ભારે આક્રોશ જોવા મળ્યો હતો. સ્થાનિકોએ મુંબઈ-અમદાવાદ નેશનલ હાઈવે બ્લોક કરી દીધો હતો, જેના કારણે એક કલાક સુધી વાહનોની લાંબી કતારો લાગી ગઈ હતી. પરિસ્થિતિ વધુ વણસી જતાં કપુરાઇ પોલીસનો કાફલો સ્થળ પર દોડી ગયો હતો અને સમજાવટ બાદ હાઇવે ખુલ્લો કરાવ્યો હતો. હાલ કપુરાઈ પોલીસે અકસ્માતનો ગુનો નોંધી કાયદેસરની કાર્યવાહી હાથ ધરી છે.