માર્ગ અકસ્માત: વાવ થરાદ જિલ્લાના કાંકરેજ તાલુકાની બે મહિલાઓને રાજસ્થાનમાં હૃદયદ્રાવક અકસ્માત નડ્યો હતો જેમાં બંનેના ઘટનાસ્થળે જ મોત થયા હતા. બનાવની વિગત મુજબ રાજસ્થાનના ધોરીમાન્ના પાસે રોડ ક્રોસ કરતી વખતે એક કારે તેમને હવામાં ફંગોળ્યા હતા ત્યારે રણુજા દર્શન કરી મહિલાઓ પરત ફરી રહી હતી. ટક્કર એટલી ભયાનક હતી કે બંને મહિલાઓએ જીવ ગુમાવ્યો હતો.
આ મહિલાઓ દુગ્રાસણ અને નાગોટ ગામની હતી
કાંકરેજ તાલુકાના દુગ્રાસણ અને નાગોટ ગામની બે મહિલા યાત્રાળુઓ રણુજાના દર્શન કરવા ગઈ હતી. જ્યાંથી પરત ફરતી વખતે તે રાજસ્થાનના ધોરીમાન્ના પાસેના એક સ્ટોપ પર બસમાંથી ઉતરી અને રસ્તો ક્રોસ કર્યો. ત્યારે પુરપાટ ઝડપે આવતી કારે ટક્કર મારતાં ગંભીર ઇજાઓ થવા પામી હતી. બંને મહિલાઓના ઘટનાસ્થળે જ મોત થયા હતા. અકસ્માતની જાણ થતાં રાજસ્થાનની ધોરીમાન્ના પોલીસ ઘટનાસ્થળે પહોંચી હતી અને મૃતદેહોને પોસ્ટમોર્ટમ માટે ખસેડી હતી. હાલ રાજસ્થાન પોલીસે અકસ્માતનો ગુનો નોંધી તપાસ હાથ ધરી છે. આ દુર્ઘટનાના પગલે કાંકરેજ પંથકમાં શોકની લાગણી પ્રસરી છે.
અસલાલી-નારોલ હાઈવે પર ઓવરટેક કરવાનો પ્રયાસ કરતી વખતે કાર પલટી, 1નું મોત
અમદાવાદના અસલાલીથી નારોલ જતા રોડ પર બુધવારે મોડી રાત્રે એક આઘાતજનક અકસ્માત સર્જાયો હતો. કન્ટેનરને ઓવરટેક કરતી વખતે એક કાબૂ બહાર આવતી કાર ડિવાઈડર સાથે અથડાઈને પલટી ગઈ હતી. અકસ્માતમાં કાર ચલાવી રહેલા 20 વર્ષીય આશાસ્પદ યુવાનનું ઘટના સ્થળે જ મોત નીપજ્યું હતું, જ્યારે કારમાં બેઠેલા તેના ચાર મિત્રોનો ચમત્કારિક બચાવ થયો હતો. અમદાવાદના દાણીલીમડા વિસ્તારમાં રહેતો હસનેન રફીકભાઈ પટેલ (ઉંમર 20) ગઈકાલે 24 ડિસેમ્બર 2025ના રોજ રાત્રે 11.00 વાગ્યાના સુમારે તેની કાર (નં. જીજે 27 ઈબી 4175)માં ચાર મિત્રો સાથે અસલાલીથી નારોલ જઈ રહ્યો હતો. લાંબો વળાંક આવે તે પહેલા હસનેને ‘એર ફીટ’ ગોડાઉનની સામે ડાબી બાજુથી આગળ જઈ રહેલી કન્ટેનર ટ્રકને ઓવરટેક કરવાનો પ્રયાસ કર્યો હતો. આ દરમિયાન કાર પરનો કાબુ ગુમાવતા કાર ડિવાઈડર સાથે અથડાઈ હતી અને રોડ પર પલટી ગઈ હતી. અથડામણ એટલી હિંસક હતી કે હસનેનને માથા અને ચહેરાના ભાગે ગંભીર ઈજાઓ થઈ હતી, જેના કારણે તેનું ઘટનાસ્થળે જ મોત થયું હતું.
આ પણ વાંચોઃ સુરતમાં વૃદ્ધ 10મા માળેથી પડીને 8મા માળે ઊંધા ફસાયા, એક કલાકની જહેમત બાદ બચાવી લેવાયા
વલ્લભીપુર-ચમારડી રોડ પર ભયાનક અકસ્માત, બે વૃદ્ધના મોત
ભાવનગર જિલ્લાના વલ્લભીપુર-ચમારડી રોડ પર આજે એક ગંભીર અકસ્માત સર્જાયો હતો. પૂરપાટ ઝડપે આવી રહેલી કારે સ્કૂટર પર સવાર બે વૃદ્ધોને ટક્કર મારી હતી અને બંનેના ઘટનાસ્થળે જ કરૂણ મોત નિપજ્યા હતા. આ ઘટનાને પગલે સ્થાનિક પંથકમાં ફફડાટ ફેલાયો છે. પોલીસ તપાસમાં અકસ્માતનો ભોગ બનનાર બંને મૃતકોની ઓળખ પ્રેમજીભાઈ જેરામભાઈ મુંજાણી (રહે. ચમારડી ગામ) અને કાંતિભાઈ કુંવરજીભાઈ જસાણી (રહે. ચમારડી ગામ) તરીકે થઈ છે. ઘટનાની જાણ થતા જ પોલીસ કાફલો ઘટના સ્થળે દોડી ગયો હતો. પોલીસે બંને મૃતદેહોને કબજે કરી વલ્લભીપુર સરકારી હોસ્પિટલમાં ખસેડ્યા છે. પીએમની વિધિ પૂર્ણ થયા બાદ મૃતદેહો તેમના પરિવારજનોને સોંપવામાં આવશે.