રાંદેર ઝોનની આંગણવાડીમાં માત્ર આઠ માસ પહેલા કરાયેલા સમારકામની પોલ હવે ખુલ્લી પડી છે. ફ્લોરિંગ નમી ગયું છે, દિવાલોમાં મોટી તિરાડો છે અને ફાયર સેફ્ટી સાધનો સમાપ્ત થઈ ગયા છે. નાના બાળકોના ભવિષ્યનું ઘડતર કરવું જોઈએ તે જગ્યાએ આજે ભય અને બેદરકારીના દ્રશ્યો જોવા મળે છે. આ સ્થિતિ માત્ર નબળી કામગીરીનો મુદ્દો નથી, પરંતુ મ્યુનિસિપલ તંત્રની બેદરકારી અને જાહેર ભંડોળના સંભવિત બગાડ અંગે પણ ગંભીર પ્રશ્નો ઉભા કરે છે. સવાલ એ છે કે જો આઠ મહિનામાં કામ આવી હાલતમાં હોય તો જવાબદાર કોણ અને તેમની સામે ક્યારે કાર્યવાહી થશે? સુરત મહાનગરપાલિકાના રાંદેર ઝોન હેઠળની નવી વસાહતની આંગણવાડીમાં અંદાજે આઠ મહિના પહેલા રીપેરીંગની કામગીરી કરવામાં આવી હતી.
સામાન્ય રીતે સરકારી ખર્ચે થતું કામ વર્ષો સુધી ચાલતું હોવું જોઈએ, પરંતુ અહીં થોડા મહિનામાં જ સમગ્ર કામની ગુણવત્તા સામે પ્રશ્નાર્થ સર્જાયો છે. કોટાના પથ્થરનું ફ્લોરિંગ ઘણી જગ્યાએ જમીનમાં ધસી ગયું છે, જ્યારે કેટલીક જગ્યાએ આખો ફ્લોર ઉબડખાબડ થઈ ગયો છે. જેના કારણે બાળકો માટે બેસવું, ચાલવું અને રમવું પણ જોખમી બની ગયું છે. ફ્લોરિંગની હાલત જેટલી ચિંતાજનક છે તેટલી જ આંગણવાડીની બહારની દિવાલોની હાલત પણ વધુ ગંભીર છે. દિવાલોમાં મોટી તિરાડો એ સ્પષ્ટ સંકેત છે કે માળખાકીય સલામતી જોખમમાં છે. સ્થાનિકોને આશંકા છે કે જો આવતીકાલે દિવાલનો કોઈ ભાગ પડી જશે તો કોઈ બાળક કે અન્ય વ્યક્તિને ઈજા થશે. આ સમગ્ર ઘટનામાં સૌથી ચોંકાવનારી વાત એ છે કે આંગણવાડીમાં રાખવામાં આવેલા ફાયર સેફ્ટીના સાધનો પણ એક્સપાયર થઈ ગયા છે. એટલે કે આગ જેવી દુર્ઘટના સર્જાય તો ફાયર સેફ્ટી સિસ્ટમ માત્ર દેખાડો સાબિત થશે.
સમગ્ર શહેરમાં ફાયર એનઓસી અને સલામતીના નિયમોનું ચુસ્તપણે પાલન કરાવતી નગરપાલિકા તેની પોતાની સંસ્થામાં નિયમોનો અમલ કરવામાં નિષ્ફળ રહી હોવાનું જણાયું છે. આ ઘટના મ્યુનિસિપલ તંત્રની નબળી દેખરેખ, ગુણવત્તા નિયંત્રણના અભાવ અને સરકારી ભંડોળના ઉપયોગ અંગે ગંભીર પ્રશ્નો ઉભા કરે છે. જો કામ યોગ્ય ગુણવત્તા સાથે થયું હોય તો માત્ર આઠ મહિનામાં જ ફ્લોરિંગ કેમ સેટ થઈ ગયું? કામ નબળી ગુણવત્તાનું હતું તો બિલ કેવી રીતે પસાર થયું? અને અધિકારીઓએ સ્થળનું નિરીક્ષણ કર્યું હોત તો આવી ગંભીર ખામીઓ તેમની નજરથી કેવી રીતે દૂર રહી? પૂર્વ કોર્પોરેટર ઉષા પટેલે ઉચ્ચ અધિકારીઓને લેખિત રજુઆત કરી સમગ્ર મામલાની તાત્કાલિક તપાસ કરી જવાબદારો સામે કડક કાર્યવાહી કરવામાં આવે અને આંગણવાડીમાં જરૂરી સમારકામની કામગીરી યુદ્ધના ધોરણે હાથ ધરવામાં આવે તેવી માંગ કરી છે.
શું કામ થયું કે માત્ર બિલો પાસ થયા?
રાંદેર ઝોનમાં આવેલી આંગણવાડીઓમાં માત્ર આઠ મહિનામાં જ ફર્શિંગ અને દિવાલોમાં તિરાડ પડવી સામાન્ય ઘટના નથી. આવી સ્થિતિ સરકારી ખર્ચે થતા કામની ગુણવત્તા સામે ગંભીર સવાલો ઉભા કરે છે. જો ધોરણ મુજબ કામ થયું હોય તો આટલા ઓછા સમયમાં ક્ષતિઓ કેમ દેખાઈ? અને જો કામ નબળી ગુણવત્તાનું હતું તો તેની તપાસ કોણે કરી? હવે સમગ્ર મામલાની ટેકનિકલ તપાસ કરી જવાબદારો સામે કાર્યવાહી કરવાની માંગ ઉઠી છે.
એક્સપાયરી ટૂલ્સ વડે બાળકોને કેવી રીતે સુરક્ષિત કરવામાં આવશે?
પોતાની આંગણવાડીમાં ફાયર સેફ્ટીના સાધનોની મુદત પૂરી થઈ ગઈ છે તે નગરપાલિકાની ગંભીર બેદરકારી દર્શાવે છે જે સમગ્ર શહેરમાં ફાયર સેફ્ટીના નિયમોના પાલન માટે કડક વલણ અપનાવી રહી છે. આગ જેવી દુર્ઘટનાના કિસ્સામાં ઉપયોગ ન કરી શકાય તેવા સાધનો રાખવા એ માત્ર નિયમો બતાવવા માટે છે. જ્યાં રોજ નાના બાળકો હાજર હોય છે ત્યાં આવી બેદરકારી અનેક સવાલો ઉભા કરે છે.