નવી દિલ્હી: તામિલનાડુના નવનિયુક્ત મુખ્યમંત્રી વિજયે શુક્રવારે સત્તા સંભાળ્યા બાદ પ્રથમ વખત ભાજપની આગેવાની હેઠળની કેન્દ્ર સરકાર પર નિશાન સાધ્યું હતું. તેમણે પાંચ રાજ્યોમાં વિધાનસભાની ચૂંટણી પૂર્ણ થયા બાદ પેટ્રોલના ભાવ વધારવાના કેન્દ્રના પગલાની ટીકા કરી હતી.પીટીઆઈએ અહેવાલ આપ્યો છે કે, તેમણે સરકારને આ નિર્ણયને “અસ્વીકાર્ય” ગણાવીને પાછો ખેંચવાની માંગ કરી હતી. વૈશ્વિક ક્રૂડ ઓઈલના ભાવમાં તાજેતરના ઉછાળા વચ્ચે શુક્રવારે પેટ્રોલ અને ડીઝલના ભાવમાં પ્રતિ લીટર 3 રૂપિયાનો વધારો કરવામાં આવ્યો હતો.લોકસભામાં વિપક્ષના નેતા સહિત વિપક્ષોએ આ પગલાની ટીકા કરતા કહ્યું છે કે, “આ મોદી સરકારની ભૂલ છે, જનતા તેની કિંમત ચૂકવશે. 3 રૂપિયાનો આંચકો તો આવી ચૂક્યો છે, બાકીની રકમ હપ્તામાં વસૂલ કરવામાં આવશે.”આસામ, કેરળ, તમિલનાડુ અને પશ્ચિમ બંગાળમાં વિધાનસભા ચૂંટણી પૂર્ણ થયાના 16 દિવસ બાદ ભાવમાં વધારો થયો છે. પશ્ચિમ એશિયામાં સંઘર્ષને કારણે વૈશ્વિક તેલના ભાવમાં તીવ્ર વધારો થવા છતાં મતદાનના સમગ્ર સમયગાળા દરમિયાન ઇંધણના દરો યથાવત રહ્યા હતા.લોકસભા ચૂંટણી પહેલા માર્ચ 2024માં પેટ્રોલ અને ડીઝલ બંને પર લીટર દીઠ રૂ. 2ના એક વખતના ઘટાડા સિવાય, એપ્રિલ 2022 થી ઇંધણના ભાવ મોટા ભાગે યથાવત રહ્યા હતા. દરમાં છેલ્લો વધારો એપ્રિલ 2022માં નોંધાયો હતો.