સાબરકાંઠામાં નકલી દૂધની ડેરી: સાબરકાંઠા જિલ્લાના પ્રાંતિજમાં આરોગ્યને અસર કરતી એક ભયાનક ઘટના પ્રકાશમાં આવી છે. લોકલ ક્રાઈમ બ્રાન્ચ (LCB) અને ફૂડ એન્ડ ડ્રગ્સ વિભાગે સંયુક્ત ઓપરેશનમાં ‘સત્ય ડેરી પ્રોડક્ટ’ નામની ફેક્ટરીમાં ચાલતા નકલી દૂધના નેટવર્કનો પર્દાફાશ કર્યો છે. અહીં ડિટર્જન્ટ અને યુરિયાનું ઘાતક મિશ્રણ કરીને દૂધ તૈયાર કરવામાં આવતું હતું.
કેવી રીતે બનાવતું હતું નકલી દૂધ?
દરોડા દરમિયાન અધિકારીઓ પણ ચોંકી ઉઠ્યા હતા. ફેક્ટરીમાં કુદરતી દૂધને બદલે કેમિકલનો ઉપયોગ કરીને ‘સફેદ ઝેર’ તૈયાર કરવામાં આવ્યું હતું. પ્રાથમિક તપાસમાં ખુલાસો થયો છે કે ડીટરજન્ટ પાઉડરનો ઉપયોગ દૂધને ઉકાળવા માટે કરવામાં આવતો હતો. દૂધની ઘનતા અને ચરબી વધારવા માટે યુરિયા ખાતર ઉમેરવામાં આવ્યું હતું. આ હાનિકારક દૂધને બજારમાં શુદ્ધ દૂધ તરીકે વેચીને લોકોના આરોગ્ય સાથે ગંભીર રમત રમવામાં આવી હતી.
આ પણ વાંચોઃ ન્યાય તો મળ્યો પણ જીવ બચ્યો, 20 રૂપિયાની લાંચના આરોપમાં 27 વર્ષથી નિર્દોષ પોલીસકર્મીનું કોર્ટના ચુકાદા બાદ મોત
4 આરોપીઓની ધરપકડ, મુખ્ય આરોપી ફરાર
એલસીબી અને ફૂડ એન્ડ ડ્રગ્સ વિભાગે બાતમીના આધારે દરોડો પાડીને સ્થળ પરથી નકલી દૂધ અને કેમિકલનો મોટો જથ્થો જપ્ત કર્યો હતો. પોલીસે આ મામલે ચાર લોકોની ધરપકડ કરી છે, જ્યારે ફેક્ટરીનો મુખ્ય સંચાલક હજુ પણ ફરાર છે અને તેને પકડવા ચક્રો ગતિમાન કર્યા છે. તંત્ર દ્વારા ફેક્ટરીને સીલ કરી દેવામાં આવી છે અને દૂધના સેમ્પલ વધુ પરીક્ષણ માટે લેબોરેટરીમાં મોકલવામાં આવ્યા છે. આ ઘટના બાદ સમગ્ર પંથકમાં ખળભળાટ મચી ગયો છે.