જામનગર વરસાદ : ચાર દિવસના વિરામ બાદ મંગળવારે સવારથી જામનગર શહેર અને જિલ્લામાં મેઘરાજા પધરામણી થયા હતા અને અડધાથી ત્રણ ઈંચ જેટલો સાર્વત્રિક વરસાદ વરસ્યો હતો. જેના કારણે ત્રણ મોટા જળાશયોમાં નવા પાણીની આવક થવા ઉપરાંત ચેકડેમોમાં નાના તળાવો પાણીથી ભરાયા છે. જો કે આજે મેઘરાજાએ ફરી વિરામ લીધો છે.

જામનગર શહેરમાં ગઈકાલે સવારથી જ દિવસભર છૂટાછવાયા ઝાપટા સાથે વરસાદ વરસ્યો હતો. જામનગર શહેરમાં છેલ્લા 24 કલાક દરમિયાન 21 મી.મી. વરસાદ પડ્યો હતો.

ઉપરાંત જોડીયામાં 32 મી.મી., ધ્રોલમાં 16 મી.મી., કાલાવડમાં 14 મી.મી. મી., લાલપુરમાં 37 મી.મી. તેમજ જામજોધપુરમાં 43 મી.મી. વરસાદ પડ્યો છે.

આ ઉપરાંત જામનગરના ગ્રામ્ય વિસ્તારની વાત કરીએ તો જામજોધપુર તાલુકાના સમાણા ગામમાં ગઈકાલે 87 મીમી વરસાદ નોંધાયો હતો. વરસાદ પડ્યો હતો, જેના કારણે નદીના પટમાં પૂર આવ્યું હતું.

જોડીયા તાલુકાના હડિયાણામાં છેલ્લા 24 કલાક દરમિયાન 74 મી.મી. વરસાદ પડ્યો છે. આ ઉપરાંત કાલાવડ તાલુકાના નિકાવામાં 60 મી.મી., જોડીયા તાલુકાના બાલંબામાં 35 મી.મી., જામનગર તાલુકાના મોતી બાંગર ગામે 50 મી.મી. કાલાવડ પાસેના ભલસાણ બેરાજા ગામમાં 55 મિ.મી., જામજોધપુરના શેઠ વડાળા ગામમાં 66 મિ.મી., વાંસજાળિયામાં 46 મિ.મી., ધ્રાફામાં 60 મિ.મી. વરસાદ પડ્યો છે.

જામનગર શહેરને પાણી પૂરું પાડતા સસોઈ ડેમમાં દોઢ ફૂટ નવું પાણી આવ્યું છે, આ ઉપરાંત જામજોધપુર અને કાલાવડ પંથકના બે ડેમમાં પણ નવા પાણીની આવક થઈ છે. આજે સવારથી હવામાન પલટાયું છે અને તે સ્વચ્છ છે. અને સમગ્ર જિલ્લામાં ક્યાંય વરસાદ નોંધાયો નથી.