ખાનગી એજન્સી મારફત બે હજાર ડ્રાઈવર-કંડક્ટરોની ભરતીની પ્રક્રિયા
ભાડા કરારના આધારે બસો લઈને નિગમ ખોટના ખાડામાં ધકેલાઈ રહી હોવાની રાવ
ભાવનગર – એસ.ટી. કોર્પોરેશનમાં કોન્ટ્રાક્ટના ધોરણે ડ્રાઈવરો-કંડક્ટરોને લઈને કોર્પોરેશનનું ખાનગીકરણ કરવાની ચાલી રહેલી હિલચાલ સામે કર્મચારીઓમાં ભારે વિરોધની લાગણી જોવા મળી રહી છે. જો આ કાર્યવાહી અટકાવવામાં નહીં આવે તો આગામી 25મીથી ઉગ્ર આંદોલનની ચીમકી આપવામાં આવી છે.
કોર્પોરેશન દ્વારા GSRTCમાં સેવાઓ/શિડ્યુલ્સ રદ થવાને કારણે ખાનગી એજન્સી દ્વારા કોન્ટ્રાક્ટના ધોરણે બે હજાર ડ્રાઈવર-કંડક્ટરોને નોકરી પર રાખવાની કાર્યવાહી ચાલી રહી છે. આ ઉપરાંત ભાડા કરારના આધારે બસો ભાડે રાખવામાં આવે છે. આવી પ્રીમિયમ બસોનું ભાડું દર મહિને આશરે 12 કરોડ છે. ત્યારે આટલું ભાડું ચૂકવવાને બદલે બે-ત્રણ વર્ષમાં તમામ વાહનોની માલિકી મેળવી શકાય છે. પ્રીમિયમ સેવાઓ માટે પ્રતિ કિ.મી.ના રૂ.46 થી 54ના ભાડાની સામે આવક માત્ર રૂ.37 થી 39 થાય છે.તે જોતા કોર્પોરેશન ખોટના ખાડામાં ધકેલાઇ રહ્યું છે. ત્રણેય માન્યતા પ્રાપ્ત સંસ્થાઓએ રાજ્યના મુખ્યમંત્રી અને નાયબ મુખ્યમંત્રીને પત્ર લખીને કોર્પોરેશનના ખાનગીકરણ તરફના પ્રથમ પગલા તરીકે લોન/કોન્ટ્રાક્ટ એજન્સી દ્વારા ડ્રાઇવર-કંડક્ટરો અને વાહનોને ભાડે આપવાનું આઉટસોર્સિંગ તાત્કાલિક રોકવાની માંગણી કરી છે. જો આ કાર્યવાહી અટકાવવામાં નહીં આવે તો 25-5થી ઓચિંતા કાર્યક્રમો દ્વારા સ્વયંભૂ આંદોલન શરૂ કરવાની ચીમકી આપી છે.