અમદાવાદ સમાચાર: ગુજરાતની આર્થિક રાજધાની અને ‘સેફ સિટી’ ગણાતું અમદાવાદ હવે ક્રાઈમ સિટી બની રહ્યું હોય તેવું લાગી રહ્યું છે. તાજેતરના દિવસોમાં, શહેરમાં નાના ખૂન અને હુમલાના બનાવોમાં ચિંતાજનક વધારો થયો છે. આવી જ એક ચોંકાવનારી ઘટના શહેરના શાહઆલમ વિસ્તારમાં બની છે. જ્યાં કાર પાર્ક કરવા જેવી સાધારણ બાબતે ઉશ્કેરાયેલા કાર ચાલકે કાર ધોવાની દુકાનમાં ઘૂસી પિતા-પુત્ર પર છરી વડે જીવલેણ હુમલો કર્યો હતો.
શું હતી સમગ્ર ઘટના?
બનાવ અંગે મળતી વિગત મુજબ શાહઆલમ વિસ્તારમાં કાર ધોવાની દુકાન પાસે એક કાર ચાલક પોતાની કાર પાર્ક કરી રહ્યો હતો. દુકાનના માલિકે ત્યાં કાર પાર્ક કરવાની ના પાડી એટલે ડ્રાઈવર ખૂબ ગુસ્સે થઈ ગયો. શરૂઆતમાં બંને પક્ષો વચ્ચે ઉગ્ર બોલાચાલી થઈ હતી. જોકે, મામલો થાળે પડવાને બદલે વધુ પેચીદો બન્યો હતો.
આરોપી ડ્રાઈવરે પોતાની કારમાંથી ધારદાર છરી કાઢી અને સીધો દુકાનની અંદર ધસી ગયો. ઉશ્કેરાટમાં, તેણે દુકાન માલિક અને તેના પુત્રને આડેધડ માર મારવાનું શરૂ કર્યું. આ ઓચિંતા હુમલાથી પિતા-પુત્ર લોહીલુહાણ થઈ ગયા હતા.
આ પણ વાંચોઃ ઈરાન એક પણ ગોળી ચલાવ્યા વિના અમેરિકાને ઝુકાવી શકે છે! ચીની પ્રોફેસરની ખતરનાક યોજના
CCTVમાં કેદ થયેલા ભયાનક દ્રશ્યો
આ સમગ્ર ઘટના દુકાનમાં લાગેલા સીસીટીવી કેમેરામાં કેદ થઈ ગઈ છે. ફૂટેજમાં સ્પષ્ટપણે જોઈ શકાય છે કે હુમલાખોર અત્યંત આક્રમક મૂડમાં દુકાનમાં ઘૂસ્યો હતો અને જોતાં જ પિતા-પુત્ર પર હુમલો કર્યો હતો. નજીકના લોકો તરત જ દોડી આવ્યા હતા અને હુમલાખોરને પકડી લીધો હતો અને પિતા-પુત્રને વધુ ઈજા થતા બચાવી લીધા હતા.
પિતા પુત્ર ગંભીર
હુમલામાં ગંભીર રીતે ઘવાયેલા પિતા-પુત્રને તાત્કાલિક સારવાર માટે એલ.જી. હોસ્પિટલમાં ખસેડવામાં આવ્યા છે, જ્યાં તેમની હાલત નાજુક હોવાનું કહેવાય છે. પોલીસે આ મામલે સીસીટીવી ફૂટેજના આધારે ગુનો નોંધી વધુ તપાસ હાથ ધરી છે. શહેરમાં વધી રહેલી હિંસાના બનાવોથી સ્થાનિક રહીશોમાં ભયનો માહોલ સર્જાયો છે. લોકોમાં સહિષ્ણુતાનો અભાવ અને કાયદો અને વ્યવસ્થાની સ્થિતિ પર હવે સવાલ ઉઠી રહ્યા છે.