અમદાવાદ સમાચાર: અમદાવાદના વેજલપુર વિસ્તારમાં ગાંધી હોલ પાસે એક ચોંકાવનારી ઘટના સામે આવી છે. અહીં ખરીદી માટે આવેલી એક મહિલા પર બેથી ત્રણ અજાણી મહિલાઓએ અચાનક હુમલો કરી ગંભીર ઇજા પહોંચાડી હતી. આ ઘટના બાદ સમગ્ર વિસ્તારમાં ચકચાર મચી ગઈ છે.
શું છે સમગ્ર ઘટના?
મળતી માહિતી મુજબ પીડિતા ગાંધી હોલમાં આયોજિત એક પ્રદર્શન કે વેચાણમાં ખરીદી કરવા આવી હતી. આ દરમિયાન કોઈ અગમ્ય કારણોસર બેથી ત્રણ મહિલાઓએ આ મહિલા પર હુમલો કર્યો હતો. હુમલો એટલો ગંભીર હતો કે મહિલાને તાત્કાલિક સારવાર માટે હોસ્પિટલમાં ખસેડવી પડી હતી. હુમલા બાદ તમામ આરોપી મહિલાઓ સ્થળ પરથી નાસી જવામાં સફળ રહી હતી.
આ પણ વાંચોઃ ગરમીના મોજા બાદ હવે માવઠાની આગાહીઃ ગુજરાતના 20થી વધુ જિલ્લાઓમાં ત્રણ દિવસ સુધી કમોસમી વરસાદની ચેતવણી
સીસીટીવીના અભાવે તપાસમાં અવરોધ
બનાવની જાણ થતા વેજલપુર પોલીસ કાફલો ઘટના સ્થળે દોડી ગયો હતો. પોલીસે ગુનો નોંધી તપાસના ચક્રો ગતિમાન કર્યા છે. જોકે પોલીસ તપાસમાં મોટી બેદરકારી બહાર આવી હતી. ગાંધી હોલ જેવા મોટા કાર્યક્રમ સ્થળોએ પૂરતા CCTV કેમેરા લગાવવામાં આવ્યા નથી. પૂરતા CCTV ન હોવાથી પોલીસને આરોપીની સ્પષ્ટ ઓળખ કરવામાં મુશ્કેલી પડી રહી છે.