વડોદરા,નવી બનેલી સાઈટ પર કલરકામ કરી રહેલા એક યુવકનું ગઈકાલે મોડી રાત્રે ત્રીજા માળેથી નીચે પડી જતાં મોત નીપજ્યું હતું. આ અંગે મંજુસર પોલીસે કાર્યવાહી હાથ ધરી છે.
પોલીસ સુત્રો પાસેથી મળતી માહિતી અનુસાર, મધ્યપ્રદેશના જેતપુર જિલ્લાના ગુરાહ ગામમાં રહેતા 33 વર્ષીય જ્ઞાનેન્દ્રસિંહ લાલ બહાદુરસિંહ વડોદરા શહેર નજીકના અણખોલ ગામના દરવાજા પાસે કામધેનુ રેસીડેન્સી નામની નવી બનેલી જગ્યામાં કલર કામ કરી રહ્યા હતા. ગત રાત્રે તે ત્રીજા માળેથી નીચે પડી ગયો હતો. તેને તાત્કાલિક સારવાર માટે સયાજી હોસ્પિટલમાં લઈ જવામાં આવ્યો હતો. પરંતુ, તેનો જીવ બચાવી શકાયો ન હતો. સ્થળ પર રહેતા અન્ય એક મજૂર શૈલેન્દ્રસિંહે જણાવ્યું હતું કે અમે રાત્રે જમીન પર સૂઈ ગયા પછી જ્ઞાનેન્દ્રસિંહ નીચે કેવી રીતે પડ્યો તેની અમને પણ ખબર નથી.