પીએમ મોદી ગુજરાતમાં: વડાપ્રધાન નરેન્દ્ર મોદી ફરી એકવાર તેમના ગૃહ રાજ્ય ગુજરાતની ત્રણ દિવસીય મુલાકાતે આવી રહ્યા છે. 10 થી 12 જાન્યુઆરી સુધીના આ પ્રવાસ દરમિયાન તેઓ સોમનાથ, રાજકોટ, અમદાવાદ અને ગાંધીનગરમાં અનેક મહત્વપૂર્ણ ધાર્મિક, સાંસ્કૃતિક, ઔદ્યોગિક અને આંતરરાષ્ટ્રીય કાર્યક્રમોમાં ભાગ લેશે.
10 જાન્યુઆરી: સોમનાથ ખાતે આધ્યાત્મિક સાંજ
વડાપ્રધાન 10 જાન્યુઆરીની સાંજે સોમનાથ પહોંચશે. અહીં તેઓ સોમનાથ મંદિર ટ્રસ્ટની બેઠકની અધ્યક્ષતા કરશે. બાદમાં, લગભગ 8 વાગ્યે, વડા પ્રધાન ‘ઓમકાર મંત્ર જાપ’ માં ભાગ લેશે અને સોમનાથ મંદિર પરિસરમાં આયોજિત ભવ્ય ડ્રોન શો પણ નિહાળશે.
11 જાન્યુઆરી: શૌર્ય યાત્રા, પૂજા અને વાઇબ્રન્ટ ગુજરાત સંમેલન
સોમનાથમાં પૂજા: 11 જાન્યુઆરીએ વડાપ્રધાન સવારે 9:45 કલાકે શૌર્ય યાત્રામાં જોડાશે. આ યાત્રા સોમનાથ મંદિરની રક્ષા માટે બલિદાન આપનાર અસંખ્ય યોદ્ધાઓને શ્રદ્ધાંજલિ આપવા માટે હાથ ધરવામાં આવે છે. ત્યારપછી સવારે 10.15 કલાકે વડાપ્રધાન સોમનાથ મંદિરની મુલાકાત લેશે અને પૂજા અર્ચના કરશે.
રાજકોટમાં ‘વાયબ્રન્ટ ગુજરાત’ ક્ષેત્રીય સંમેલન
સોમનાથના કાર્યક્રમો બાદ વડાપ્રધાન રાજકોટ જવા રવાના થશે, જ્યાં તેઓ કચ્છ અને સૌરાષ્ટ્ર વિસ્તારો માટે આયોજિત ‘વાઈબ્રન્ટ ગુજરાત રિજનલ કોન્ફરન્સ’માં ભાગ લેશે. તેઓ બપોરે 1:30 વાગ્યે ટ્રેડ શો અને પ્રદર્શનનું ઉદ્ઘાટન કરશે. બાદમાં બપોરે 2 વાગ્યે, વડાપ્રધાન રાજકોટની મારવાડી યુનિવર્સિટીમાં સંમેલનનું ઔપચારિક ઉદ્ઘાટન કરશે અને જાહેર સભાને પણ સંબોધશે.
અમદાવાદમાં મેટ્રોનું ઉદ્ઘાટન: રાજકોટથી વડાપ્રધાન અમદાવાદ જશે. સાંજે લગભગ 5:15 વાગ્યે, તેઓ મહાત્મા મંદિર મેટ્રો સ્ટેશન ખાતે સેક્ટર 10A થી મહાત્મા મંદિર સુધી અમદાવાદ મેટ્રોના બીજા તબક્કાના બાકીના વિભાગનું ઉદ્ઘાટન કરશે.
જાન્યુઆરી 12: જર્મન ચાન્સેલર સાથે દ્વિપક્ષીય વાટાઘાટો
વડા પ્રધાન નરેન્દ્ર મોદીના આમંત્રણ પર, જર્મન ચાન્સેલર ફ્રેડરિક મર્ઝ 12 અને 13 જાન્યુઆરીએ ભારતની સત્તાવાર મુલાકાત લેશે.
સાબરમતી આશ્રમ અને પતંગ ઉત્સવ: 12 જાન્યુઆરીએ સવારે 9:30 કલાકે વડાપ્રધાન અને જર્મન ચાન્સેલર સાબરમતી આશ્રમની મુલાકાત લેશે. બાદમાં, સવારે 10 વાગ્યે, બંને નેતાઓ સાબરમતી રિવરફ્રન્ટ ખાતે આયોજિત આંતરરાષ્ટ્રીય પતંગ મહોત્સવમાં ભાગ લેશે.
દ્વિપક્ષીય વાટાઘાટો: વડાપ્રધાન અને જર્મન ચાન્સેલર વચ્ચે દ્વિપક્ષીય મંત્રણા ગાંધીનગરના મહાત્મા મંદિર ખાતે સવારે 11:15 વાગ્યાથી થશે. આ બેઠકોમાં ભારત-જર્મની વ્યૂહાત્મક ભાગીદારીના 25 વર્ષ પૂરા થવા પર થયેલી પ્રગતિની સમીક્ષા કરવામાં આવશે. આ ચર્ચાઓ વેપાર અને રોકાણ, ટેકનોલોજી, શિક્ષણ, સંરક્ષણ અને સુરક્ષા જેવા મુદ્દાઓ પર ધ્યાન કેન્દ્રિત કરશે.
