સુરત રેલ્વે સ્ટેશન ગરનાળાથી કિરણ હોસ્પિટલ જતી BRTS બસમાં બેઠેલા એક યુવકે બસ કંડક્ટરને હું ધારાસભ્યનો પુત્ર હોવાનું કહીને દાદાગીરી કરી હતી. કંડક્ટર દરવાજા પાસે ઊભો રહીને મુસાફરોને અમરોલી જવા માટે બોલાવતો હતો. દરમિયાન આ યુવક બસમાં ચઢતાની સાથે જ કંડક્ટરનો કોલર જાલીને તું અહીં કેમ ઉભો છે તેમ કહી ધમકી આપવા લાગ્યો હતો.

જ્યારે બસ કંડક્ટરે કોલર કેમ પકડી રાખ્યો છે તેમ પૂછતાં યુવકે ઉગ્ર બોલાચાલી કરી હતી. આ ઉપરાંત તેણે પોતાની સાથે લાવેલી બેગમાંથી લાખો રૂપિયાની 500-500ની નોટોના બંડલ બતાવી ‘તમે શું માનો છો કે હું ભિખારી છું’ તેમ કહી દલીલ કરવા લાગ્યો હતો. આ સમગ્ર મામલે વીડિયો સોશિયલ મીડિયા પર વાયરલ થઈ રહ્યો છે.

આ સમગ્ર ઘટના અંગે કંડક્ટરે પોલીસ કંટ્રોલ રૂમને ફોન કરીને ઘટનાની જાણ કરી હતી. દરમિયાન સુમૂલ ડેરી પાસે યુવક નીચે ઉતરતો રહ્યો હતો. આ ઘટના અંગે પ્રતિક્રિયા આપતા સિટી બસ એજન્સીએ જણાવ્યું હતું કે કંડક્ટરે યુવકો સાથે કોઈપણ રીતે ગેરવર્તણૂક કરી નથી અને કંડક્ટર દ્વારા કોઈપણ રીતે નિયમોનું ઉલ્લંઘન કરવામાં આવ્યું નથી. તેમજ પોતાને ધારાસભ્યના પુત્ર તરીકે ઓળખાવનાર યુવક અંગે હજુ સુધી કોઈ માહિતી મળી નથી.

સમગ્ર બબાલ દરમિયાન યુવક પોતાના ફોન પર જે ફોટો બતાવી રહ્યો હતો તે ધારાસભ્યના બદલે કોર્પોરેટરનો હોવાનું બહાર આવ્યું છે. બામરોલી ઉધના ઉત્તરના કોર્પોરેટર પરેશ પટેલે ખુલાસો કર્યો હતો કે બસ કંડક્ટર સાથે ગેરવર્તન કરનાર યુવક સાથે તેમનો કોઈ સંબંધ નથી.