વડોદરા એલસીબીએ દારૂ ઝડપ્યોઃ ગુજરાતમાં દારૂબંધીનો ભંગ કરીને ડ્રગ્સનો કાળો કારોબાર ચલાવતા તત્વો સામે વડોદરા પોલીસે લાલ આંખ કરી છે. વડોદરા એલસીબી (લોકલ ક્રાઈમ બ્રાંચ) ઝોન-3ની ટીમે નેશનલ હાઈવે પરના જાંબુવા નજીકથી દવાની આડમાં હરિયાણાથી એક કન્ટેનરમાં વિદેશી દારૂની હેરાફેરી કરવામાં આવેલો જંગી જથ્થો જપ્ત કર્યો છે. પોલીસે સ્થળ પરથી 11,000થી વધુ દારૂની બોટલો સાથે એક વ્યક્તિને ઝડપી લીધો છે, જ્યારે દારૂ મંગાવનાર વડોદરાના કુખ્યાત બુટલેગર સહિત ત્રણને વોન્ટેડ જાહેર કરવામાં આવ્યા છે.
કન્ટેનરમાંથી દારૂ કપાઈ રહ્યો હતો અને પોલીસ ત્રાટકી હતી
અનુસા, વડોદરા એલસીબી પાસેથી મળતી માહિતી. ઝોન-3ની ટીમને ચોક્કસ અને ખાનગી બાતમી મળી હતી કે તરસાલીથી જાંબુવા રોડ પાસે ખુલ્લા મેદાનમાં એક શંકાસ્પદ કન્ટેનર પાર્ક કરી વિદેશી દારૂનો જથ્થો અન્ય વાહનોમાં કટિંગ કરવામાં આવી રહ્યો છે. આ માહિતીના આધારે એલસીબીની ટીમે ઓચિંતો દરોડો પાડ્યો હતો. પોલીસે સ્થળ પરથી કન્ટેનરના ડ્રાઈવર 30 વર્ષીય જૈદ મોહમ્મદ (રહે. મેવાત, હરિયાણા)ની ધરપકડ કરી હતી.
દવાની પેટી પાછળ 11,383 દારૂની બોટલો સંતાડી હતી
પોલીસે જ્યારે કન્ટેનરની તલાશી લીધી ત્યારે ઉપર કાયદેસરની દવાઓની બોટલોના બોક્સ મુકેલા હતા, પરંતુ પાછળ છુપાવેલ વિદેશી દારૂનો મોટો જથ્થો હતો. પોલીસે કન્ટેનરમાંથી વિદેશી દારૂની વિવિધ બ્રાન્ડની કુલ 11,383 બોટલો જપ્ત કરી હતી, જેની બજાર કિંમત રૂ. 30,72,600 છે. આ ઉપરાંત પોલીસે ગુનામાં વપરાયેલ કન્ટેનર, મોબાઈલ ફોન અને 2 લાખની કિંમતનો ડ્રગ્સ મળી કુલ રૂ.53,77,600નો મુદ્દામાલ કબજે કર્યો છે.
વડોદરાના બુટલેગર સહિત 3 વોન્ટેડ
ઝડપાયેલા હરિયાણાના ડ્રાઈવર ઝૈદ મોહમ્મદની કડક પૂછપરછ બાદ આ દારૂનો જથ્થો કોણે મોકલ્યો હતો અને વડોદરામાં કોને સપ્લાય કરવાનો હતો તેના નામો ખુલ્યા છે. જેના આધારે પોલીસે દારૂ મોકલનાર સાબીર ઉર્ફે શબ્બીર (રહે. હરિયાણા) અને આ જથ્થો વડોદરામાં મંગાવનાર સ્થાનિક બુટલેગર આકાશ અશોકભાઈ ઠાકરડા (રહે. ભાલીયાપુરા ગામ) અને મેહુલ નટવરભાઈ કહાર (રહે. વડોદરા)ને વોન્ટેડ જાહેર કર્યા છે. એલસીબી પોલીસે આ મામલે ગુનો નોંધી ફરાર ત્રણ બુટલેગરોને ઝડપી લેવા ચક્રો ગતિમાન કર્યા છે.