અમદાવાદ સમાચાર: નારોલના પીપલજ પાસે ટ્રક ઉભી રાખી ચાલક આરામ કરી રહ્યો હતો ત્યારે કારમાં સવાર ચાર શખ્સોએ છરી બતાવી ડીઝલની ટાંકીનું લોક તોડી તેમાંથી રૂ. 22,500ની કિંમતનું 250 લીટર ડીઝલની ચોરી થઇ હતી. આ બનાવ સંદર્ભે નારોલ પોલીસે ચોરીનો ગુનો નોંધી સીસીટીવી ફૂટેજના આધારે વધુ તપાસ હાથ ધરી છે. આ ઘટના 29 એપ્રિલે બની હતી જેના માટે હવે ફરિયાદ નોંધવામાં આવી છે.
ભાવનગરના એક યુવકે નારોલ પોલીસ સ્ટેશનમાં ચાર અજાણ્યા શખ્સો વિરુદ્ધ ફરિયાદ નોંધાવી છે કે તેઓ 29-04-2026ના રોજ અસલાલીથી પીપળાજ કોમોડ, ઈન્દિરાનગર જતા રોડની બાજુમાં 14 ટાયરની ટ્રક પાર્ક કરીને કેબિનમાં આરામ કરી રહ્યા હતા. તે સમયે ટ્રકની પાછળ એક કાર ઉભી રહી હતી અને કારમાંથી ચાર વ્યક્તિઓ બહાર નીકળી હતી. તેમાંથી બે શખ્સોએ ટ્રકનું ડીઝલ લોક તોડવાનું શરૂ કર્યું હતું. આ જોઈને ફરિયાદી ડ્રાઈવર નીચે ઉતરવા જતો હતો ત્યારે તેની સામે અન્ય બે શખ્સો હાથમાં છરી લઈને ઉભા હતા.
ટ્રકના ચાલકને જાનથી મારી નાખવાની ધમકી આપ્યા બાદ ડીઝલની ટાંકી ચેક કરતાં રૂ. 22,500ની કિંમતનું 250 લીટર ડીઝલની ચોરી થઇ હતી. ફરિયાદી ડ્રાઈવરે નીચે ઉતરીને તપાસ કરતાં ડીઝલની ચોરી થઈ હોવાનું જાણવા મળ્યું હતું. ઉલ્લેખનીય છે કે મિડલ ઈસ્ટમાં યુદ્ધના કારણે છેલ્લા બે મહિનાથી કેટલીક જગ્યાએ ઈંધણની અછત સર્જાઈ છે, જેથી ડીઝલ ચોરીનો આ વિચિત્ર કિસ્સો સામે આવ્યો છે.