અમદાવાદમાં ચોરી: અમદાવાદમાં હજુ પણ તસ્કરોનો આતંક જોવા મળી રહ્યો છે. શહેરના પોશ આવકવેરા વિસ્તારમાં ચોરીનો અનોખો કિસ્સો પ્રકાશમાં આવ્યો છે, જ્યાં નીચેના માળે ઘરના સભ્યોની હાજરી હોવા છતાં ઉપરના માળેથી તસ્કરો લાખો રૂપિયાની ચોરી કરી ગયા હતા. તસ્કરોએ એક મકાનને નિશાન બનાવી રૂ.2,30,792ની મતાની ચોરી કરી હતી.
તસ્કર દાદરા ચડીને દંપતી ટીવી જોવામાં મગ્ન હતું
આ બનાવ અંગે કોમ્પ્યુટર સેલ્સ અને સર્વિસનો વ્યવસાય કરતા 37 વર્ષીય મયંકભાઈ શાહે પોલીસમાં ફરિયાદ નોંધાવી છે. 30 એપ્રિલની રાત્રે મયંકભાઈ અને તેમના પત્ની બે માળના મકાનના નીચેના રૂમમાં બેસી ટીવી જોઈ રહ્યા હતા. આ દરમિયાન, તસ્કરો મકાનનો પાછળનો દરવાજો તોડીને સીડી દ્વારા ઉપરના માળે પહોંચ્યા હતા, જે વધારાનો સામાન રાખવા માટે ઉપયોગમાં લેવાતો ઓરડો હતો.
આ પણ વાંચોઃ અમદાવાદઃ SG હાઈવે પર પુલના કામ માટે મુકવામાં આવેલ બેરિકેડ પડતાં રિક્ષા પલટી, મુસાફરનું મોત
તિજોરી સાફ કરી, એસી પાઇપ પણ ન છોડ્યો
ઉપરના રૂમમાંથી અચાનક અવાજ સંભળાતા મયંકભાઈ અને તેમના પત્ની તપાસ કરવા દોડી ગયા હતા. ત્યાં પહોંચીને જોયું તો લોખંડની તિજોરી ખુલ્લી હતી અને સામાન વેરવિખેર પડ્યો હતો. ચોરોએ તિજોરીમાંથી જૂની ચલણી નોટોનો સંગ્રહ, એક સોનાનું લેડીઝ બ્રેસલેટ અને બે મોંઘી ઘડિયાળો, પિત્તળના વાસણો અને એસી કોપર પાઇપ, કોમ્પ્યુટર અને કેમેરાના વાયરની ચોરી કરી હતી.
આ મામલે પીડિત પરિવારે અજાણ્યા શખ્સો સામે પોલીસ ફરિયાદ નોંધાવી છે. ફરિયાદીના જણાવ્યા મુજબ, ચોર પાછળનો દરવાજો તોડીને સીડી દ્વારા ઉપરના રૂમમાં પ્રવેશ્યો હતો. આ અંગે પોલીસે ગુનો નોંધી તસ્કરોને ઝડપી લેવા તપાસના ચક્રો ગતિમાન કર્યા છે.