રાજકોટની ઘટના
હિટ એન્ડ રન કેસ: રાજ્યના રાજકોટ અને જામનગરમાં આજે (20 એપ્રિલ) હિટ એન્ડ રનની ઘટના બની છે. રાજકોટમાં બનેલી ઘટનામાં બાઇક ચાલકનું મોત થયું છે. જ્યારે જામનગરમાં રોડ પર ઉભેલા એક મહિલા અને બાળકના મોત થયા છે. બંને બનાવમાં કાર ચાલક અકસ્માત સર્જી નાસી છૂટ્યો હતો. હાલ પોલીસ દ્વારા કાર ચાલકને શોધવાના પ્રયાસો હાથ ધરવામાં આવ્યા છે.
રાજકોટમાં હિટ એન્ડ રનની ઘટના, 1નું મોત
રાજકોટની સ્વસ્તિક સોસાયટી પાસે હિટ એન્ડ રનની ઘટના બની છે. એક ઝડપી કાર ચાલકે સ્ટિયરિંગ પરનો કાબૂ ગુમાવ્યો હતો અને એરપોર્ટ ગેટ પાસે ચારથી વધુ લોકોને ટક્કર મારી હતી. આ ગમખ્વાર અકસ્માતમાં ચાલકે બાઇક સવાર મુસાફરોને જોરથી ટક્કર મારતાં એકનું કરૂણ મોત નીપજ્યું હતું.
જામનગર-કાલાવડ હાઈવે પર પણ હિટ એન્ડ રનની ઘટના, 2ના મોત
કાલાવડ-જામનગર હાઈવે પર નવા માર્કેટિંગ યાર્ડ પાસે શેરડીનો રસ પી રહેલા નિર્દોષ નાગરિકોને એક ઝડપી કારે ટક્કર મારી હતી. આ ગંભીર હિટ એન્ડ રનની ઘટનામાં બે લોકોના ઘટનાસ્થળે જ મોત થયા હતા. મળતી માહિતી મુજબ, એક મહિલા અને એક બાળક ભોગ બન્યા છે. જ્યારે અન્ય બે લોકો ગંભીર રીતે ઘાયલ થયા છે જેમને સારવાર માટે રાજકોટની સિવિલ હોસ્પિટલમાં ખસેડવામાં આવ્યા છે. હવે તેની હાલત નાજુક હોવાનું જાણવા મળે છે. ઘટનાની જાણ થતાં જ સ્થાનિક પોલીસ કાફલો ઘટના સ્થળે પહોંચી ગયો હતો અને લાશને પોસ્ટમોર્ટમ માટે ખસેડી ફરાર કાર ચાલક સામે કાયદેસરની કાર્યવાહી હાથ ધરી હતી.