અમરેલીમાં હની ટ્રેપ રેકેટનો પર્દાફાશ: અમરેલી જિલ્લાના રાજુલા પંથકમાં પોલીસે હનીટ્રેપ કરતી ગેંગને ઝડપી પાડી છે. હિંડોરણા ગામની સીમમાં યુવકને લઈ જઈ મહિલા સાથે વીડિયો રેકોર્ડિંગ કરી બદનામ કરવાની ધમકી આપી લાખો રૂપિયા પડાવવાના કાવતરાને પોલીસે નિષ્ફળ બનાવ્યો છે.
હિંડોરણા ગામની સીમમાં આ કાવતરું ઘડવામાં આવ્યું હતું
મળતી માહિતી મુજબ, થોડા દિવસો પહેલા એક મહિલા સહિત પાંચ વ્યક્તિઓએ હનીટ્રેપનું કાવતરું ઘડ્યું હતું. ફરિયાદી યુવકને રાજુલાના હિંડોરણા ગામની સીમમાં બાવળના કાંટામાં લઈ ગયો હતો. પૂર્વ આયોજિત કાવતરા મુજબ યુવતી સાથે યુવકનો વીડિયો ત્યાં ઉતારવામાં આવ્યો હતો. આ દરમિયાન અન્ય શખ્સો ત્યાં ધસી આવ્યા હતા અને યુવકને ઢોર માર મારી લૂંટ ચલાવી હતી.
આરોપીએ યુવક પાસેથી બળજબરીપૂર્વક 1950 રૂપિયા રોકડા અને તેનો મોબાઈલ ફોન છીનવી લીધો હતો. આટલેથી ન અટકતા આરોપીએ વીડિયો વાયરલ ન કરવાના બદલામાં વધુ 5 લાખ રૂપિયાની માંગણી કરી. આરોપીએ યુવકને ઘરેથી પૈસા લેવા માટે મોકલ્યો હતો, પરંતુ ગભરાવાને બદલે ફરિયાદીએ સીધો રાજુલા પોલીસ સ્ટેશન પહોંચી સમગ્ર ઘટના જણાવી હતી.
આ પણ વાંચોઃ અમદાવાદઃ શેરબજારમાં 20% વળતરની લાલચ આપીને ₹32 કરોડનું કૌભાંડ, MP ફિનકોર્પના માલિક, પત્ની અને માતાની ધરપકડ
પોલીસ કાર્યવાહી અને ધરપકડ
આ મામલે રાજુલા પોલીસે તાત્કાલિક કાર્યવાહી કરી હતી. પોલીસે આ હનીટ્રેપ રેકેટમાં સંડોવાયેલી મુખ્ય મહિલા સહિત કરણ પટાટ, જિતેન્દ્ર ચૌહાણ અને અન્ય એક આરોપીની ધરપકડ કરી છે.
આ સફળ કામગીરી બાદ ડીવાયએસપી નયના ગોરડિયાએ પત્રકાર પરિષદ યોજી હતી. તેમણે કહ્યું કે, ‘આ કેસમાં હજુ પણ એક અજાણ્યો આરોપી ફરાર છે, જેને પકડવા માટે તજવીજ હાથ ધરવામાં આવી છે. રાજુલા પંથકમાં અન્ય કોઈ આ પ્રકારના હનીટ્રેપનો શિકાર બન્યા હોય તો ગભરાશો નહીં રાજુલા પોલીસનો સંપર્ક કરો જેથી આ ગેંગના અન્ય ગુનાઓનો પણ પર્દાફાશ થઈ શકે.’