સુરત કોર્પોરેશન: આગામી સુરત મહાનગરપાલિકાની ચૂંટણી પહેલા ભાજપ-આપ ચૂંટણીની તૈયારી કરી રહ્યા છે તો બીજી તરફ સુરત કોંગ્રેસ વિખેરાઈ રહી છે. કોંગ્રેસના નવા શહેર પ્રમુખની જાહેરાત બાદ સિનિયર નેતાઓની અવગણના અને અન્ય કારણોસર ઘણાએ હોદ્દા પરથી રાજીનામું આપી દીધું છે. તો આજે જુથબંધીથી કંટાળીને પ્રદેશના પૂર્વ મંત્રીએ કોંગ્રેસના પ્રાથમિક સભ્યપદેથી રાજીનામું આપી દીધું છે. ગઈકાલે યુથ કોંગ્રેસ દ્વારા ગુજરાતમાં દારૂ અને ડ્રગ્સની બદી સામે આક્રમક રેલીનું આયોજન કરવામાં આવ્યું હતું પરંતુ શહેર કોંગ્રેસ પ્રમુખને આમંત્રણ આપવામાં આવ્યું ન હતું. જેથી પ્રમુખ વગર અસરકારક રેલી કાઢવામાં આવી હતી. હવે સુરત કોંગ્રેસ આગામી દિવસોમાં પાલિકા સામે વિરોધ કરવાની તૈયારી કરી રહી છે.
સુરત મહાનગર પાલિકાની આગામી ચૂંટણી માટે ભાજપ અને આમ આદમી પાર્ટી કમર કસી રહી છે ત્યારે સુરત કોંગ્રેસમાં આંતરિક જૂથવાદ સામે આવ્યો છે. શહેર કોંગ્રેસ એક જૂથ તરીકે ચૂંટણી લડે તેવી શક્યતાઓ હવે નહિવત દેખાઈ રહી છે. સુરત કોંગ્રેસ સંગઠન જુથબંધીની આગમાં સળગી રહ્યું છે કારણ કે શહેર કોંગ્રેસ જુથબંધીને રોકવામાં સદંતર નિષ્ફળ ગઈ છે. સુરત કોંગ્રેસના પ્રમુખ તરીકે વિપુલ ઉધનાવાલાની નિયુક્તિ બાદ શહેર કોંગ્રેસની હાલત કફોડી બની રહી છે. તેમાં પણ પ્રમુખની સાથે સંસ્થાની ટીમની જાહેરાત કરવામાં આવી હતી, જેમાંથી ઘણાએ હોદ્દો સ્વીકારવાનો ઈન્કાર કરી દીધો હતો અને રાજીનામું આપી દીધું હતું. પખવાડિયા પહેલા મહિલા કોંગ્રેસે પ્રમુખ પર ગંભીર આક્ષેપો કરીને રાજીનામું આપ્યું હતું.
આ વિવાદ ઠંડો પડે તે પહેલા કોંગ્રેસના પૂર્વ રાજ્યમંત્રી ફિરોઝ મલેકે કોંગ્રેસના પ્રાથમિક સભ્યપદેથી રાજીનામું આપી કોંગ્રેસનો હાથ અને ટેકો છોડી દીધો છે. નવા પ્રમુખની નિમણૂક બાદ વધુ એક ફરિયાદ સપાટી પર આવી છે કે સિનિયરોની સતત અવગણના કરવામાં આવી રહી છે. રાજીનામાને માત્ર એક વ્યક્તિગત નિર્ણય નહીં પરંતુ સંગઠન સામે ગંભીર સમસ્યાઓની ચેતવણી તરીકે જોવામાં આવે છે.
સુરત શહેરમાં લાંબા સમય બાદ ગઈકાલે યુથ કોંગ્રેસ દ્વારા ગુજરાતમાં દારૂ અને ડ્રગ્સની બદી સામે આક્રમક રેલી કાઢી હતી. નવાઈની વાત એ છે કે આ રેલીમાં શહેર કોંગ્રેસ પ્રમુખને આમંત્રણ આપવામાં આવ્યું ન હતું. પરિણામે સુરતમાં પ્રથમવાર શહેર પ્રમુખની ગેરહાજરીમાં કોંગ્રેસની પ્રભાવી અને વિશાળ રેલી યોજાઈ હતી. આ ઘટનાએ સંગઠનમાં ચાલી રહેલી આંતરિક ખેંચતાણનો પર્દાફાશ કર્યો છે. રેલીમાં શહેર પ્રમુખની ગેરહાજરીના કારણે અનેક અટકળો ચાલી રહી છે.
આ સ્થિતિ વચ્ચે શહેર કોંગ્રેસ હવે આગામી દિવસોમાં સુરત મહાનગરપાલિકા સામે અલગથી આંદોલન કરવાની તૈયારી કરી રહી છે. જોકે, આંતરિક જૂથબંધી દૂર કર્યા વિના અને સંગઠનને એક પણ સૂત્રમાં બાંધ્યા વિના આવા વિરોધ પ્રદર્શનો માત્ર દેખાવ બની રહેશે તેવી રાજકીય ચર્ચા શરૂ થઈ છે. જેમ જેમ નગરપાલિકાની ચૂંટણી નજીક આવી રહી છે ત્યારે સુરત કોંગ્રેસ માટે સૌથી મોટો પડકાર વિપક્ષ નહીં પરંતુ પોતાનું ઘર સંભાળવાનો છે. નવાઈની વાત એ છે કે સુરત કોંગ્રેસમાં ઘણા સમયથી જૂથબંધી ચરમસીમાએ છે તેમ છતાં પ્રદેશ દ્વારા પણ આ જૂથવાદને રોકવા કે તમામ જૂથોને સાથે રાખવાના કોઈ પ્રયાસો કરવામાં આવ્યા નથી.
