સુરત પોલીસની ગેરવર્તણૂક અમદાવાદ બાદ સુરતમાં પણ સામાન્ય નાગરિકો સાથે પોલીસની ગેરવર્તણૂક સામે આવી છે. હકીકતમાં રાત્રે દુકાન ખુલ્લી રાખવા બાબતે પોલીસ અને દુકાનદાર વચ્ચે ઝઘડો થયો હતો. જે બાદ પોલીસે ગુંડા જેવું વર્તન કરતા દુકાનદારને ધક્કો મારીને હિંસક વલણ અપનાવ્યું હતું. આ ઘટનાનો સીસીટીવી વિડીયો વાયરલ થયા બાદ લોકો પોલીસની કાર્યવાહીની જોરદાર નિંદા કરી રહ્યા છે.
આ પણ વાંચોઃ ગીર સોમનાથમાં 176 પોલીસ કર્મચારીઓની એક સાથે બદલી, SPના આદેશથી કડક કાર્યવાહી, જુઓ યાદી
શું હતી ઘટના?
મળતી માહિતી મુજબ, પોલીસ ગુરુવાર (18 ડિસેમ્બર) રાત્રે ઉમરા વિસ્તારમાં આવેલી એક દુકાનમાં ગઈ હતી. દરમિયાન દુકાનદાર અને પોલીસ વચ્ચે ઘર્ષણ થયું હતું. ત્યારબાદ પોલીસકર્મી ગુસ્સે અને આક્રમક વર્તન કરતો જોવા મળ્યો હતો. દુકાન ખુલ્લી રાખવા બાબતે દુકાનદાર સાથે થયેલી બોલાચાલીમાં દુકાનદારને ધક્કો માર્યો હતો. શાંતિપૂર્ણ ઘટનામાં આવી હિંસાનો ઉપયોગ કરવા બદલ પોલીસકર્મીની નિંદા કરવામાં આવી રહી છે. હવે આ ઘટનાનો CCTV વીડિયો પણ સોશિયલ મીડિયા પર વાયરલ થઈ રહ્યો છે.
પોલીસકર્મી સામે તપાસ
પોલીસકર્મીનો વીડિયો વાઈરલ થયા બાદ લોકો સોશિયલ મીડિયા પર પોલીસની કામગીરી પર પોતાનો ગુસ્સો વ્યક્ત કરી રહ્યા છે. વીડિયો સામે આવ્યા બાદ અધિકારીઓ દ્વારા આ મામલે કડક કાર્યવાહી માટે તપાસ હાથ ધરવામાં આવી છે.
આ પણ વાંચોઃ વડોદરાની MS યુનિવર્સિટીમાં રેગિંગની ઘટના? સ્ટુડન્ટે માર માર્યો, વીડિયો થયો વાયરલ
અમદાવાદમાં પણ પોલીસની ગેરરીતિ
નોંધનીય છે કે અગાઉ અમદાવાદમાંથી પણ આ પ્રકારની ઘટના સામે આવી હતી. જેમાં જયંતિ ઝાલા નામના પોલીસકર્મી પાલડી પોલીસ સ્ટેશનમાં ફરજ પર હતા. દરમિયાન એક મહિલાના આઈડી કાર્ડની આપલે કરતી વખતે આઈડી કાર્ડ નીચે પડી ગયું હતું. પોલીસકર્મી જયંતિ ઝાલાએ આ સાદી બાબતમાં પોતાનો ગુસ્સો ગુમાવી દીધો હતો અને ખાકી વર્દીમાં પાવર બતાવીને મહિલાની દાદાગીરી શરૂ કરી હતી. મામલો એ હદે વધી ગયો કે પોલીસકર્મીએ મહિલાની ગરિમા જાળવવાને બદલે તેના પર હાથ ઉપાડ્યો. સમગ્ર ઘટનાનો વિડીયો વાયરલ થયા બાદ મામલાને ગંભીરતાથી લઈ હેડ કોન્સ્ટેબલને તાત્કાલિક અસરથી ફરજ પરથી સસ્પેન્ડ કરવામાં આવ્યો છે. બીજી તરફ ટ્રાફિક નિયમનમાં અડચણ ઉભી કરવા બદલ મહિલા સામે કેસ દાખલ કરવામાં આવ્યો છે.