અમદાવાદ-રાજકોટ હાઇવે: 31મી ડિસેમ્બરની ઉજવણી પહેલા રાજ્યમાં દારૂની હેરાફેરી રોકવા પોલીસ તંત્ર એક્શન મોડમાં છે ત્યારે અમદાવાદ ગ્રામ્યમાં બગોદરા પોલીસે એક મોટી સફળતા હાંસલ કરી છે. અમદાવાદ-રાજકોટ હાઈવે પર બગોદરા ટોલ ટેક્સ પાસે વાહન ચેકિંગ દરમિયાન પોલીસે નારંગી કેરેટની આડમાં લઈ જવામાં આવતો લાખો રૂપિયાનો વિદેશી દારૂ જપ્ત કરી બુટલેગરના કારનામાનો પર્દાફાશ કર્યો હતો.
નારંગીની આડમાં દારૂની હેરાફેરી પોલીસ સૂત્રોના જણાવ્યા અનુસાર બગોદરા પોલીસની ટીમ ટોલટેક્ષ પાસે રૂટીન વાહન ચેકીંગમાં હતી. દરમિયાન અમદાવાદ તરફથી આવી રહેલી એક શંકાસ્પદ આઇશર ટ્રકને અટકાવી તપાસ હાથ ધરવામાં આવી હતી. પ્રાથમિક તપાસમાં ટ્રકમાં પ્લાસ્ટિકના ક્રેટમાંથી નારંગી મળી આવ્યા હતા. જોકે, ટ્રક ચાલક પાસે માલનું સ્પષ્ટ બિલ ન હોવાથી પોલીસને શંકા ગઈ હતી. ટ્રકની ઝીણવટભરી તલાશી લેતા પોલીસે નારંગી કેરેટની પાછળ સરસ રીતે સંતાડેલો વિદેશી દારૂનો જંગી જથ્થો મળી આવ્યો હતો.
48 લાખની કિંમતનો દારૂ અને 58 લાખનો મુદામાલ જપ્ત કરાયો છે
પોલીસને ટ્રકમાંથી ભારતીય બનાવટના વિદેશી દારૂના કુલ 295 કાર્ટન મળી આવ્યા હતા. જેમાં 180 એમ.એલ.ની 14,160 નાની બોટલો હતી. જેની કિંમત રૂ. 48,14,400 અને ટ્રકની કિંમતઃ રૂ. 10,00,000 M કુલ રૂ. 58,40,400/ (મોબાઇલ સહિત) જપ્ત કરવામાં આવ્યા હતા.
આ કેસમાં પોલીસે બે આરોપીઓ ટ્રક ડ્રાઈવર રણબીર સિંહ રણજીત સિંહ રાજપૂત (ઉંમર 50) અને શેર સિંહ રતનલાલ રાજપૂત (ઉંમર 24)ની ધરપકડ કરી છે. પોલીસ પૂછપરછમાં બહાર આવ્યું છે કે દારૂનો આ જથ્થો હરિયાણાના મનીષ ઉત્તમચંદ શર્માએ મોકલ્યો હતો અને ગુજરાતમાં કોઈ અજાણ્યા વ્યક્તિને પહોંચાડવાનો હતો. પોલીસે ફરાર આરોપીને ઝડપી લેવા અને આ દારૂ ક્યાંથી સપ્લાય કરવાનો હતો તે અંગે વધુ તપાસ હાથ ધરી છે.
