પંચમહાલ સમાચાર: પંચમહાલ જીલ્લાના ગોધરા તાલુકાના વાવડી ખુર્દ ગામે ગ્રામ પંચાયત કચેરી જંગમાં ફેરવાઈ ગઈ હતી. પંચાયતની સામાન્ય સભા દરમિયાન વિકાસના કામોની ચર્ચામાં જૂથ અથડામણ અને મારામારી થઈ હતી.
પ્રાપ્ત માહિતી અનુસાર વાવડી ખુર્દ ગ્રામ પંચાયતમાં આજે સામાન્ય સભાનું આયોજન કરવામાં આવ્યું હતું. બેઠકમાં ગામમાં થનારા વિવિધ વિકાસના કામો અંગે ચર્ચા વિચારણા કરવામાં આવી હતી. આ દરમિયાન કોઈ મુદ્દે ઉગ્ર બોલાચાલી થઈ હતી અને પરિસ્થિતિ કાબૂ બહાર જતાં બંને પક્ષોએ મારામારી શરૂ કરી હતી.
આ ઘટનામાં બે લોકો ઘાયલ થયા હોવાનું જાણવા મળ્યું છે. ઘટનાની જાણ થતાં જ 108 એમ્બ્યુલન્સની ટીમ ઘટના સ્થળે દોડી આવી હતી અને ઇજાગ્રસ્તોને તાત્કાલિક સારવાર માટે ગોધરાની સિવિલ હોસ્પિટલમાં ખસેડવામાં આવ્યા હતા.
ઉલ્લેખનીય છે કે પંચાયતની ચાલી રહેલી સભામાં થયેલી આ મારામારીની સમગ્ર ઘટના મોબાઈલ કેમેરામાં કેદ થઈ હતી, જેનો વીડિયો હાલ સોશિયલ મીડિયા પર વાયરલ થઈ રહ્યો છે.