સુરત અકસ્માત: સુરતના લસકાણા વિસ્તારમાં રવિવારે (15 ફેબ્રુઆરી)ના રોજ એક ભયાનક અકસ્માત સર્જાયો હતો. ગઢપુર વાય જંકશન પાસે એક મોપેડ પર સવાર એક જ પરિવારના ત્રણ સભ્યોને એક ઝડપી ટ્રકે ટક્કર મારી હતી. અકસ્માતમાં ગંભીર રીતે ઘવાયેલા 72 વર્ષના વૃદ્ધનું તેના જ ભાઈની સામે જ મોત નિપજતાં પરિવારમાં શોક વ્યાપી ગયો હતો.
અજાણ્યા ટ્રક ચાલકે મોપેડને જોરદાર ટક્કર મારી હતી
મળતી માહિતી મુજબ, ભાવનગરના મહુવા તાલુકાના લોંગડી ગામના વતની અને હાલ સુરતના નાના વરાછા ખાતે રહેતા 68 વર્ષીય મનુભાઈ સવાણી તેમના 6 વર્ષના પૌત્ર હિયાન સાથે મોપેડ પર તેમની 72 વર્ષીય બહેન સરોજબેન પટેલને મળવા ગયા હતા. મનુભાઈ તેમની બહેનને મળ્યા બાદ મોપેડ પર તેમની બહેન અને પૌત્ર સાથે પરત ફરી રહ્યા હતા, ત્યારે ગઢપુર વાય જંકશન નજીક શિવંત હાઈટ્સ પાસે એક અજાણી ટ્રકે તેમને પાછળથી જોરદાર ટક્કર મારી હતી.
આ પણ વાંચોઃ અમદાવાદના ચાણક્યપુરીમાં પ્રેમ પ્રકરણમાં બે રાઉન્ડ ફાયરિંગ, યુવક ઘાયલ
અથડાતાં સરોજબેનની ટ્રકના પાછળના ટાયર નીચે આવી જતાં ત્રણેય વ્યક્તિઓ રોડ પર પટકાયા હતા. અકસ્માત બાદ ઘટનાસ્થળે હાજર અન્ય મહિલાઓએ ભારે હિંમત દાખવી હતી. લોહીલુહાણ હાલતમાં પડેલા સરોજબેનને મહિલાઓએ ઉપાડીને ખાનગી કારમાં હોસ્પિટલ લઇ જવાનો પ્રયાસ કર્યો હતો. જો કે, આ દરમિયાન 108 એમ્બ્યુલન્સ આવી અને તેને હોસ્પિટલ લઈ ગઈ, પરંતુ સારવાર મળે તે પહેલા તેનું મોત નીપજ્યું.
અકસ્માત સર્જી ટ્રક ચાલક ફરાર
અકસ્માત બાદ ટ્રક ચાલક પોતાનું વાહન મુકીને સ્થળ પરથી ફરાર થઈ ગયો હતો. પોલીસે મનુભાઈ સવાણીની ફરિયાદના આધારે ફરાર ટ્રક ચાલક સામે ગુનો નોંધી વધુ તપાસ હાથ ધરી છે. પોલીસે ટ્રક નંબરના આધારે ચાલકને શોધવા ચક્રો ગતિમાન કર્યા છે.