ગુજરાત પોલીસ સમાચાર: એક પત્ર વાયરલ થયો છે કે રાજ્ય પોલીસ વડાએ ગુજરાત પોલીસમાં વિવિધ રેન્જ અને શહેરોમાં પાંચ વર્ષ કે તેથી વધુ સેવા આપી હોય તેવા પોલીસ ઈન્સ્પેક્ટર અને પોલીસ સબ ઈન્સ્પેક્ટરોની વિગતો મંગાવી છે. આ ઉપરાંત પીઆઈ અને પીએસઆઈની નોકરી અંગેનો બીજો પત્ર પણ વાયરલ થયો હતો. પત્રમાં જણાવવામાં આવ્યું છે કે કોઈપણ રેન્જ કે શહેરમાં પાંચ વર્ષ કે તેથી વધુ સમયથી ફરજ બજાવતા પીઆઈ અને પીએસઆઈને તેમની હાલની રેન્જની નજીકની રેન્જમાં ટ્રાન્સફર કરવામાં આવશે નહીં. આ પરિપત્રને પગલે પોલીસ અધિકારીઓમાં પણ નારાજગી જોવા મળી હતી.
ત્યારે રાજ્યના પોલીસ વડા વિકાસ સહાયે મહત્વનો ખુલાસો કર્યો હતો કે રેન્જ ટ્રાન્સફર અંગે કોઈ પરિપત્ર બહાર પાડવામાં આવ્યો નથી. માત્ર પાંચ વર્ષથી ફરજ બજાવતા અધિકારીની વિગતો માંગવામાં આવી હતી. ગત 2 ઓગસ્ટના રોજ ડીજીપી વિકાસ સહાયની સહીવાળો એક પરિપત્ર વાયરલ થયો હતો. જેમાં તેમણે રાજ્યની વિવિધ રેન્જમાં સતત પાંચ વર્ષ ફરજ બજાવતા પોલીસ ઈન્સ્પેક્ટર અને પોલીસ સબ ઈન્સ્પેક્ટરોની યાદી મંગાવી હતી.
આ સિવાય એક અન્ય પત્ર પણ વાયરલ થયો હતો. જેમાં એવું જણાવાયું હતું કે, ગૃહ વિભાગે તાત્કાલિક અસરથી પીઆઈ અને પીએસઆઈની બદલીમાં પારદર્શિતા લાવવા પાંચ વર્ષ કે તેથી વધુ સમયથી એક રેન્જમાં ફરજ બજાવતા અધિકારીઓની બદલી કરવી જોઈએ. તે પણ સ્પષ્ટ કરવામાં આવ્યું હતું કે આ ટ્રાન્સફર હાલની રેન્જ અથવા કમિશનરેટમાંથી જિલ્લા અથવા નજીકની રેન્જમાં થવી જોઈએ નહીં. વડોદરા રેન્જ અને વડોદરા સિટી, અમદાવાદ રેન્જ અને અમદાવાદ સિટી, રાજકોટ રેન્જ અને રાજકોટ સિટી, સુરત રેન્જ અને સુરત સિટી, ગાંધીનગર, પંચમહાલ, ભાવનગર, જૂનાગઢ અને બોર્ડર રેન્જમાં કામ કરતા ઘણા અધિકારીઓ પ્રભાવિત થયા હતા. ત્યારે આ પરિપત્ર અને વાયરલ પત્ર મુદ્દે આંતરિક રોષની લાગણી જોવા મળી હતી.
આ અંગે ડીજીપી વિકાસ સહાયે મહત્વનું નિવેદન આપતાં જણાવ્યું હતું કે, પાંચ વર્ષ કે તેથી વધુ સમયથી રેન્જમાં ફરજ બજાવતા પીઆઈ કે પીએસઆઈની રેન્જમાં ફેરફાર અંગે કોઈ પરિપત્ર બહાર પાડવામાં આવ્યો નથી. પાંચ વર્ષ કે તેથી વધુ સમયથી ફરજ બજાવતા અધિકારીની વિગતો એકત્રિત કરવી એ વહીવટી બાબત છે. ડીજીપીના આ મહત્વપૂર્ણ નિવેદનને પગલે પોલીસ અધિકારીઓએ રાહત અનુભવી છે.
